दुचाकीवरुन पडल्याने महिला गंभीर
By लोकमत न्यूज नेटवर्क | Published: February 9, 2021 04:25 AM2021-02-09T04:25:51+5:302021-02-09T04:25:51+5:30
लोकमत न्यूज नेटवर्क कोल्हापूर : भरधाव दुचाकीवरुन प्रवास करताना अचानक भोवळ येऊन रस्त्यावर पडल्याने महिला गंभीर जखमी झाली आहे. ...
लोकमत न्यूज नेटवर्क
कोल्हापूर : भरधाव दुचाकीवरुन प्रवास करताना अचानक भोवळ येऊन रस्त्यावर पडल्याने महिला गंभीर जखमी झाली आहे. सुमती सुभाष सदरेकर (वय ६२, रा. शिवाजीनगर, हुपरी) असे जखमीचे नाव असून, हा अपघात हुपरी ते उत्तूर मार्गावर झाला. सुमती या त्यांचा मुलगा नामदेव सदरेकर याच्या दुचाकीवर पाठीमागे बसून जात असताना ही दुर्घटना घडली. त्यांच्या डोक्याला गंभीर दुखापत झाली असून, त्यांच्यावर सीपीआर रुग्णालयात उपचार सुरु आहेत.
दुचाकीस्वार जखमी
कोल्हापूर : राष्ट्रीय महामार्गावर कागलनजीक लक्ष्मी टेकडीजवळ भरधाव वेगातील दुचाकी घसरून झालेल्या अपघातात उत्तम बाळकृष्ण मुसळे (वय ३४, रा. संकेश्वर, ता. चिक्कोडी) हे जखमी झाले. ही घटना रविवारी मध्यरात्री घडली. त्यांच्यावर सीपीआर रुग्णालयात उपचार सुरु आहेत.
रस्ते अपघातात जखमी
कोल्हापूर : गोकुळ शिरगावनजीक मयूर पेट्रोल पंपाजवळ झालेल्या अपघातात तरुण गंभीर जखमी झाला आहे. भिकाराम चापलाल घारु (वय २४, रा. कागल) असे जखमीचे नाव असून, त्याला गंभीर स्थितीत १०८ रुग्णवाहिकेतून उपचारासाठी सीपीआर रुग़्णालयात दाखल केले आहे. या अपघाताची नोंद सीपीआर पोलीस चौकीत झाली आहे.
सायकलची चोरी
कोल्हापूर : येथील नागाळा पार्क, महावीर महाविद्यालय परिसरातील वसंत निवारा बिल्डींग येथील पार्किंगमध्ये उभी केलेली सुमारे दहा हजार रुपये किंमतीची सायकल अज्ञाताने चोरुन नेली. बिल्डींगमधील वाॅचमन बाहेर गेल्याची संधी साधत अज्ञाताने सायकल चोरल्याची शक्यता आहे. दीपक लक्ष्मण पवार (वय ३९, रा. नागाळा पार्क) यांनी शाहूपुरी पोलीस ठाण्यात सायकल चोरीची तक्रार दिली आहे.
लक्ष्मीपुरी भाजी मार्केटमधून मोबाईलची चोरी
कोल्हापूर : येथील रविवार पेठेतील लक्ष्मीपुरी मार्केटमध्ये भाजी खरेदीसाठी गेलेल्या वृध्दाच्या खिशातील सुमारे सात हजार रुपये किमतीचा मोबाईल अज्ञाताने चोरुन नेला. याबाबत अब्दुलमजीद रसुल मुल्ला (वय ६९, रा. विजयनगर हाऊसिंग सोसायटी, कदमवाडी रोड) यांनी लक्ष्मीपुरी पोलीस ठाण्यात चोरीची तक्रार दिली.
दुचाकीच्या धडकेत कोथळीची महिला गंभीर
कोल्हापूर : कोल्हापूर ते राधानगरी मार्गावर कोथळी (ता. करवीर) येथे भरधाव दुचाकीने धडक दिल्याने पादचारी महिला गंभीर जखमी झाली. आक्कुबाई दत्यात्रय पाटील (वय ७०, रा. कोथळी, ता. करवीर) असे जखमींचे नाव असून, ही घटना रविवारी सायंकाळी घडली. महिलेच्या डोक्याला गंभीर दुखापत झाल्याने तिच्यावर खासगी रुग़्णालयात उपचार सुरु आहेत. आक्कुबाई यांचा मुलगा अशोक दत्तात्रय पाटील (रा. कोथळी) यांनी करवीर पोलीस ठाण्यात दिलेल्या तक्रारीवरुन दुचाकीस्वार दीपक जालंदर आंबी (वय २६, रा. चांदणी गल्ली, राशीवडे, ता. करवीर) याच्यावर गुन्हा दाखल करण्यात आला आहे.