बावड्यात इमारतीच्या चौथ्या मजल्यावरून पडून महिलेचा मृत्यू

कसबा बावडा :

कसबा बावडा-कदमवाडी रोडवरील वसंत निवारा इमारतीत राहणाऱ्या सविता रवींद्र मोहिते या चौथ्या मजल्यावरून पडून गंभीररित्या जखमी झाल्या होत्या. त्यांना तत्काळ खासगी रुग्णालयामध्ये उपचारासाठी दाखल करण्यात आले. पण उपचारादरम्यान त्यांचा मृत्यू झाला.

अधिक माहिती अशी, रवींद्र मोहिते हे आपल्या कुटुंबीयासंवेत कसबा बावडा- कदमवादी रोडवरील वसंत निवारा इमारतीत चौथ्या मजल्यावर राहतात. आज सकाळी सात वाजण्याच्या सुमारास त्यांची पत्नी सविता या घराच्या बाल्कनीत उभ्या असताना तोल जाऊन खाली कोसळल्या. गंभीर जखमी झालेल्या सविता मोहिते यांना तात्काळ उपचारासाठी एका खाजगी रुग्णालयात दाखल केले. दुपारी एक वाजण्याच्या सुमारास उपचार सुरू असताना सविता मोहिते यांचा मृत्यू झाला.

सीपीआर येथे दुपारी शवविच्छेदन करून मृतदेह नातेवाइकांच्या ताब्यात देण्यात आला. रवींद्र मोहिते हे एका बँकेत नोकरीस असून त्यांना एक सहा वर्षाची मुलगी आहे. अचानक घडलेल्या या घटनेमुळे मोहिते कुटुंबीयांना धक्का बसला असून सीपीआर येथे मयत सविता मोहिते यांचे नातेवाईक शोकमग्न अवस्थेत उभे होते. दरम्यान या घटनेची नोंद शाहूपुरी पोलीस ठाण्यात झाली.