यड्रावमध्ये उसाचा ट्रॅक्टर पानपट्टीमध्ये घुसला

यड्राव : ऊस वाहतूक ट्रॅक्टरच्या आडवे आलेल्या दुचाकीला वाचविताना ट्रॅक्टर रस्त्यालगत असणाऱ्या पानपट्टीच्या खोक्यात घुसल्याने पानपट्टी चालक किरकोळ जखमी झाला. ही घटना जयसिंगपूर मार्गावरील पार्वती औद्योगिक वसाहतीजवळ संगमनगर फाटा येथे सायंकाळी साडेपाचच्या सुमारास घडली.

पंचगंगा साखर कारखान्याकडे ऊस वाहतूक सुरू होती. अचानकपणे ट्रॅक्टरसमोर दुचाकीस्वार आल्याने त्याला वाचविण्याच्या प्रयत्नात चालकाचा ताबा सुटल्याने ट्रॅक्टर रस्त्यालगत असलेल्या गजानन नरसाळे यांच्या पानपट्टीत घुसला. यावेळी नरसाळे पानपट्टीत होते. पण सुदैवाने किरकोळ जखमी झाले.

अपघातामुळे या मार्गावर वाहतूक कोंडी निर्माण झाली होती. या घटनेची माहिती समजताच शहापूरचे पोलीस उपनिरीक्षक गणेश खराडे, शशिकांत ढोणे, बापू खरजे, आसिफ शिराजभाई यांनी घटनास्थळी दाखल होऊन गर्दीला हटवून वाहतूक सुरळीत केली. रात्री उशिरापर्यंत शहापूर पोलीस ठाण्यात गुन्हा दाखल करण्याचे काम सुरू होते.

फोटो - १३०३२०२१-जेएवाय-०४

फोटो ओळ -

पार्वती औद्योगिक वसाहतीजवळ चालकाचा ताबा सुटल्याने उसाने भरलेला ट्रॅक्टर पानपट्टीमध्ये घुसला.