वाहनाच्या धडकेत तरुण जखमी

लोकमत न्यूज नेटवर्क

कोल्हापूर : संभाजीनगर येथील इंदिरा सागर चौकात भरधाव अज्ञात वाहनाच्या धडकेत तरुण गंभीर जखमी झाला. अमर अमृता पाटील (वय २८, रा. गजानन महाराज नगर, कोल्हापूर) असे जखमी तरुणाचे नाव आहे. अमर याच्या डोक्‍याला व पायाला गंभीर दुखापत झाली आहे. जखमीचा मावसभाऊ अजय दिनकर पाटील (रा. गजानन महाराज नगर) यांनी जुना राजवाडा पोलीस ठाण्यात तक्रार दिली आहे. त्यानुसार अज्ञात वाहनांवर गुन्हा दाखल केला आहे.

फुलेवाडीत अपघातात जखमी

कोल्हापूर : येथील फुलेवाडी पहिला बसस्टॉप येथे रविवारी रात्री उशिरा झालेल्या अपघातात एकजण गंभीर जखमी झाला. मंगेश पांडुरंग नाडकर्णी (वय ५०, रा. ताराबाई पार्क) असे जखमीचे नाव आहे. त्यांना उपचारासाठी तातडीने सीपीआर रुग्णालयात दाखल केेले. अपघाताची नोंद सीपीआर पोलीस चौकीत झाली आहे.

दुसऱ्या लग्नाबाबत पतीसह तिघांवर गुन्हा

कोल्हापूर : पहिल्या पत्नीसोबत घटस्फोटाबाबत प्रकरण न्यायप्रविष्ट असताना परस्पर दुसरे लग्न केल्याबद्दल राजारामपुरी पोलीस ठाण्यात पतीसह तिघांवर अदखलपात्र गुन्हा दाखल झाला. पती योगेश केरबा पोवार (वय ३८), सासू शिला केरबा पोवार (३८ दोघेही रा. गजानन कॉलनी, फुलेवाडी रिंगरोड) व अनुजा ऊर्फ राजश्री संजय महाजन (४२ रा. हातकणंगले) अशी तिघांची नावे आहेत. याबाबत पत्नी मेघा योगेश पोवार (रा. सुभाषनगर) यांनी पोलिसांत तक्रार दिली.

पोर्ले येथे विष प्राशनाने मुलीचा मत्यू

कोल्हापूर : पन्हाळा तालुक्यातील पोर्ले तर्फ ठाणे येथील एका तेरा वर्षाच्या मुलीने विषारी द्रव्य प्राशन केल्याने तिचा मृत्यू झाला. समीक्षा महादेव अडकूर (रा. पोर्ले तर्फ ठाणे) असे मृत मुलीचे नाव आहे. रविवारी रात्री तिने विष प्राशन केल्यानंतर तिला बेशुद्धावस्थेत उपचारासाठी सीपीआरमध्ये दाखल केले, पण उपचारापूर्वीच तिचा मृत्यू झाला. याची नोंद सीपीआर पोलीस चौकीत झाली आहे.