अपघातातील जखमी इंगळीच्या तरुणाचा मृत्यू

निपाणी : कागलहून निपाणीकडे येत असताना अज्ञात वाहनाने धडक दिल्यानंतर जखमी झालेल्या दुचाकीस्वाराचा उपचारादरम्यान मृत्यू झाला. सचिन बाळासो आंबी (वय ४० रा. इंगळी) असे मृताचे नाव आहे. हा अपघात सोमवारी रात्री साडेदहाच्या सुमारास येथील खरी कॉर्नर येथे घडला होता.

अधिक माहिती अशी की, सचिन हे आपली दुचाकी (क्र एमएच ०९ एटी २२४४) वरून कागलहून निपाणी येथे नातेवाईकांना भेटायला येत होते. या वेळी खरी कॉर्नर येथे अज्ञान वाहनाने त्याच्या दुचाकीला जोराची धडक दिली. यात ते गंभीर जखमी झाले होते. त्यांना महात्मा गांधी रुग्णालयात दाखल केले असता पुढील उपचारासाठी त्यांना कोल्हापूर येथील सीपीआर रुग्णालयात दाखल करण्यात आले होते. उपचारादरम्यान त्यांचा मृत्यू झाला. त्यांच्या पश्चात आई, पत्नी, २ मुली, भाऊ असा परिवार आहे. हातकणंगले पंचायत समितीच्या सदस्य वैजयंती आंबी यांचे ते पुत्र होते.

फोटो ३१ सचिन आंबी