दुचाकी धडकेत तरुण जखमी

लोकमत न्यूज नेटवर्क

कोल्हापूर : गोखले महाविद्यालय चौकानजीक भरधाव दुचाकीने पाठीमागून दिलेल्या धडकेत तरुण जखमी झाला. उपेंद्र उर्फ मायकेल प्रकाश आडगुणकर (वय ३०, रा. चिले कॉलनी, आयसोलेशन हॉस्पिटल रोड) असे जखमीचे नाव आहे. तो आपल्या दुचाकीवरुन अंबाबाई मंदिरातून घरी जात असताना ही दुर्घटना घडली. दरम्यान, अपघातानंतर धडक दिलेल्या दुचाकीस्वाराने पलायन केले. उपेंद्रच्या हाताला गंभीर दुखापत झाली आहे. त्याची आई ज्योत्स्ना प्रकाश आडगुणकर यांनी जुना राजवाडा पोलिसात अज्ञात दुचाकीस्वाराविरोधात तक्रार दिली आहे.

मोबाईल चोरी

कोल्हापूर : फुलेवाडी रिंगरोडनजीक जिल्हा परिषद कॉलनीतील मैदानात फुटबॉल खेळाडूचा मोबाईल अज्ञाताने चोरला. गणेश कुंडलिक भोसले (वय १८, रा. अयोध्या कॉलनी, रिंगरोड) हा मैदानात फुटबॉल खेळत असताना, त्याने कडेला मोबाईल ठेवला होता, तो अज्ञाताने चोरला. गणेशने मोबाईल चोरीची तक्रार करवीर पोलिसात दिली.

दुचाकी चोरी

कोल्हापूर : कसबा बावडा येथे छत्रपती राजाराम कॉलनी, शुगर मील परिसरातून अज्ञाताने दुचाकी चोरुन नेली. प्रमोद केशवराव जाधव यांनी आपल्या घराच्या कंपाऊंडमध्ये उभी केलेली दुचाकी गुरुवारी मध्यरात्री अज्ञाताने चोरुन नेली. त्यांनी याबाबत शाहुपूरी पोलीस ठाण्यात चोरीची तक्रार दिली.

‘सीबीएस’वरुन लॅपटॉप चोरी

कोल्हापूर : येथील मध्यवर्ती बसस्थानक परिसरातून प्रवाशाचा सुमारे दहा हजार रुपयांचा लॅपटॉप अज्ञाताने चोरुन नेला. नितीन वसंत नलवडे (रा. नागाव, ता. हातकणंगले) यांनी याबाबत शाहुपूरी पोलीस ठाण्यात चोरीची तक्रार दिली.