लातुरात पहाटे २ फ्लॅट फोडले; पाच लाखांचे दागिने पळविले !

जिल्हाभरात घरफाेड्यांच्या घटनामध्ये वाढ  

लातूर : शहरातील बार्शी राेडवर असलेल्या एका अपार्टमेंटमधील दाेन फ्लॅट भल्या पहाटे फाेडून चाेरट्यांनी तब्बल पाच लाखांचा ऐवज पळविल्याची घटना घडली. याबाबत एमआयडीसी पाेलिस ठाण्यात गुन्हा दाखल करण्यात आला आहे.

पाेलिसांनी सांगितले, फिर्यादी राजेश रतनलाल तोष्णीवाल (रा. रतलाम मध्य प्रदेश, ह.मु. चैतन्य अपार्टमेंट, बार्शी रोड, लातूर) हे सध्याला बार्शी राेडवरील चैतन्य अपार्टमेंटमध्ये वास्तव्याला आहेत. त्यांच्या फ्लॅटचा अज्ञात चाेरट्यांनी कडीकोंडा तोडून प्रवेश केला. घरात ठेवण्यात आलेले ४ लाख ५१ हजार १६३ रुपयांचे साहित्य, त्याचबराेबर याच अपार्टमेंटमध्ये शेजारी राहणाऱ्या एकाच्या फ्लॅटमधील ४० हजारांची राेकड असा एकूण जवळपास ४ लाख ९१ हजार १६३ रुपयांचा ऐवज चोरट्यांनी पळविला आहे.

यामध्ये साेन्याच्या बांगड्या, पेंडल, लेडिज रिंग, चेन आणि रोख रक्कम असा हा मुद्देमाल असल्याचे फिर्यादी राजेश तोष्णीवाल यांनी एमआयडीसी ठाण्यात दिलेल्या तक्रारीत म्हटले आहे. घटनास्थळी पाेलिसांनी भेट देऊन पंचनामा केला आहे. याबाबत एमआयडीसी पाेलिस ठाण्यात गुन्हा दाखल करण्यात आला आहे. तपास पोलिस उपनिरीक्षक संदीप कराड करत आहेत.