अल्पवयीन मुलीवर पित्याकडून अत्याचार

रेणापूर पोलिसांनी सांगितले, शहरातील पिंपळफाटा येथील दर्जी बोरगाव रस्त्यावर राहत असलेले एक कुटुंब दररोज भिक्षा मागून आपली उपजीविका भागवितात. कुटुंबातील सर्व जण भिक्षा मागण्यासाठी गेले असता, आरोपी पिता हा १४ वर्षीय अल्पवयीन मुलीवर अत्याचार करीत असे. याबद्दल आई व कुणालाही काहीही सांगू नकोस, अन्यथा तुला आणि तुझ्या आईला मारून टाकेन, अशी धमकी देत असे. त्यामुळे मुलीने कुणालाही सांगितले नाही.

काही दिवसापासून सदरील अल्पवयीन मुलीच्या पोटात दुखत असल्याने आईने तिला उपचारासाठी दवाखान्यात नेले, तेव्हा डॉक्टरांनी तपासणी केली असता, ती पाच ते सहा महिन्याची गरोदर असल्याचे निष्पन्न झाले. त्यामुळे आईने मुलीस विचारणा केली असता, पित्याने अत्याचार केल्याचे सांगून धमकी दिल्याचे म्हणाली. त्यामुळे पीडित मुलीच्या आईने गुरुवारी रात्री उशिरा रेणापूर पोलीस ठाण्यात फिर्याद दिल्याने, बाललैंगिक अपराध संरक्षण कायद्यासह अन्य कलमान्वये पित्यावर गुन्हा दाखल करण्यात आला.

आरोपीस चार दिवसाची पोलीस कोठडी...

रेणापूर पोलिसांनी गुरुवारी रात्रीच आरोपीस अटक केली. शुक्रवारी रेणापूर न्यायालयासमोर हजर केले असता, न्यायालयाने आरोपीस चार दिवसाची पोलीस कोठडी सुनावली आहे. अधिक तपास पोलीस निरीक्षक नानासाहेब उबाळे यांच्या मार्गदर्शनाखाली सपोनि. क्रांती निर्मळ, सपोउपनि. राजकुमार गुळभिले हे करीत आहेत.