जुना वाद उफाळून आला, रागाच्या भरात दिराने भावजईचा खून केला

घटनेनंतर आरोपी फरार झाला असून शोधासाठी पोलिसांची पथके रवाना झाली आहेत

उदगीर (लातूर) : शहरातील बसवेश्वर गल्ली परिसरात राहणाऱ्या महिलेचा दिराने मागील भांडणाचा राग मनात धरुन बुधवारी रात्री ७.३० वाजेच्या सुमारास चाकूने पोटात वार करुन खून केल्याची घटना घडली. याबाबत उदगीर शहर पोलिस ठाण्यात गुन्हा दाखल करण्यात आला आहे.

पोलिसांनी सांगितले, उदगीर शहरातील काळा मारुती, बसवेश्वर गल्लीमध्ये शालुबाई चंद्रकांत आलमकरे (वय ५५) व सुरेश अमृतप्पा आलमकरे हे वेगवेगळे राहतात. बुधवारी रात्री साडेसात वाजेच्या सुमारास सुरेश आलमकरे याने मागील भांडणाचा राग मनात धरून शालूबाई आलमकरे यांना शिवीगाळ करून पोटावर चाकूने वार केले. शालूबाई यांना उपचारासाठी रुग्णालयात नेले असता डॉक्टरांनी मृत घोषित केले. 

घटनेनंतर आरोपी फरार झाला असून, उदगीर शहर पोलीस ठाण्यात भाग्यश्री सुरेश आलमकरे यांच्या फिर्यादीवरून उदगीर शहर पोलीस ठाण्यात गुरुवारी पहाटे कलम १०३(१), ३५२ बीएनएस नुसार गुन्हा दाखल करण्यात आला आहे. पुढील तपास पोलीस उपनिरीक्षक राठोड करीत आहेत.