आधी दारू पाजली, नंतर रस्त्याच्या मध्यभागी सोडत भरधाव कारने उडवत तरुणाचा खून

युवकाच्या वडिलांच्या तक्रारीवरून खुनाचा गुन्हा दाखल

देवणी : जेवायला चल म्हणून बोलावून बारमध्ये नेले. तेथे दारू पाजवून रस्त्यावर सोडले आणि आपल्याच कारने जोराची धडक देऊन एकाचा खून केल्याची घटना उदगीर तालुक्यातील वागदरी पाटी येथे बुधवारी रात्री घडली. याबाबत मयताचे वडील विलासराव लंके यांनी दिलेल्या तक्रारीवरून देवणी पोलिस ठाण्यात एकाविरुद्ध गुन्हा दाखल करण्यात आला आहे. दरम्यान, पोलिसांनी आरोपीस अटक केली असून, त्यास न्यायालयाने तीन दिवसांची कोठडी सुनावली आहे.

पोलिसांनी सांगितले, उदगीर तालुक्यातील तोगरी येथील प्रवीनानंद विलासराव लंके (वय ३८) यांस आरोपी अमोल रामचंद्र बिरादार (रा. करवंदी ता. उदगीर) याने बुधवारी रात्री कारमधून वागदरी येथील एका बारवर दारू पिण्यासाठी नेले. तेथेच दारु पाजवून भांडण उकरून काढले. त्यानंतर रस्त्यावर सोडून देत स्वत:च्या कारने प्रवीनानंद यास जोराची धडक दिली. यात प्रवीनानंद गंभीर जखमी होऊन मयत झाला आहे, असे वडील विलासराव लंके यांनी देवणी पोलिसांत दिलेल्या तक्रारीत म्हटले आहे.

त्यानुसार अमोल बिरादार याच्याविरुद्ध भारतीय न्यायसंहिता कलम १०३ (१) प्रमाणे गुन्हा दाखल करण्यात आला आहे. आरोपीस पोलिसांनी अटक केली असून, गुरुवारी न्यायालयात हजर केले असता तीन दिवसांची पोलिस कोठडी सुनावली आहे. पुढील तपास पोलिस निरीक्षक माणिकराव डोके, पो.हे.कॉ विनायक कांबळे, नरेश उस्तुर्गे, गणेश बुजारे करीत आहे.