गोठ्यात झोपलेल्या तरुणाची ठरली अखरेची रात्र, सकाळी आढळला रक्ताच्या थारोळ्यात मृतदेह

धारदार शस्त्राने झोपीतील तरुणावर वार करुन खून, खूनाचे कारण उलगडेना

औसा (जि. लातूर) : तालुक्यातील वडजी येथील एका २५ वर्षीय तरुणावर अज्ञातांनी धारधार शस्त्राने झोपीतच वार करुन खून केल्याची घटना शनिवारी सकाळी उघडकीस आली. याप्रकरणी भादा पोलिस ठाण्यात गुन्हा दाखल करण्यात आला आहे. खुनाचे कारण अद्यापही उलगडले नाही.

रणजित तानाजी माळी (२५, रा. वडजी, ता. औसा) असे मयत तरुणाचे नाव आहे. वडजी येथील मयत रणजित माळी हा दुधाचा व्यवसाय करीत होता. त्याच्याकडे १० म्हशी असल्याने तो आंदोरा रस्त्यावर असलेल्या शेतातील गोठ्यात रात्री मुक्कामी राहत असे. नेहमीप्रमाणे शुक्रवारी रात्री शेतात झोपण्यासाठी गेलेला रणजित हा शनिवारी सकाळी दूध घेवून डेअरीला आला नसल्याने आई-वडिलांनी त्याची चौकशी केली.

तेव्हा त्याचे मित्र शेतात गेले असता त्याचा मृतदेह रक्ताच्या थारोळ्यात पडला होता. तसेच मृतदेहावर पलंग पडला होता. हे पाहून मित्रांनी त्याच्या आई- वडिलास माहिती दिली. त्यावरुन आई- वडिलांनी घटनास्थळाकडे धाव घेतली. दरम्यान, यासंदर्भात पोलिसांना माहिती देण्यात आल्याने भादा पोलिसांनी घटनास्थळाचा पंचनामा केला.

याप्रकरणी भादा पोलिसांनी अज्ञात आरोपीविरुद्ध कलम ३०२ प्रमाणे खुनाचा गुन्हा दाखल केला. घटनास्थळी उपविभागीय पोलिस अधिकारी रामदास इंगवले, सपोनि. बाळासाहेब डोंगरे यांनी भेट देऊन पाहणी केली. मयत रणजितच्या पश्चात आई-वडील, एक भाऊ, विवाहित बहीण असा परिवार आहे.