Latur Accident: नादुरुस्त ट्रकवर दुचाकीस्वार आदळले; एक ठार, दोघे जखमी
By ऑनलाइन लोकमत | Published: June 28, 2022 06:40 PM2022-06-28T18:40:06+5:302022-06-28T18:41:14+5:30
बाईक चालवणारा तरुण ठार झाला असून सोबतचे दोघे जखमी झाले आहे
Latur Accident: नादुरुस्त ट्रकवर दुचाकीस्वार आदळले; एक ठार, दोघे जखमी
Next किनगाव (जि. लातूर) : अहमदपूर तालुक्यातील देवकरा पाटीजवळ नादुरुस्त असलेल्या ट्रकवर दुचाकीस्वार आदळल्याने एकजण ठार, तर दोघे गंभीर झाल्याची घटना सोमवारी रात्री ९.४५ वा. च्या सुमारास घडली आहे.
हणमंत भागवत जाधव (३५, रा. बनसावरगाव, ता. चाकूर) असे अपघातात मयत झालेल्या व्यक्तीचे नाव आहे. चाकूर तालुक्यातील बनसावरगाव येथील हणमंत भागवत जाधव, गोविंद नाईकवाडे (२५, रा. नागोबानगर, अहमदपूर) व माऊली कांबळे (४०, रा. लातूर रोड) हे तिघे काही कामानिमित्त दुचाकीवरून (एमएच २४, बीएफ ०८१७) अंबाजोगाई तालुक्यातील धर्मापुरी येथे गेले होते. तेथील काम आटोपून सोमवारी रात्री ते अहमदपूरकडे परतत होते.
तेव्हा देवकरा पाटीजवळ थांबलेल्या नादुरुस्त ट्रक (एपी २७, डब्ल्यू ९५९५) ला पाठीमागून जोराची धडक दिली. या अपघातात दुचाकीचालक हणमंत जाधव हे जागीच ठार झाले. दोघेजण गंभीर जखमी झाले. त्यांना उपचारासाठी अंबाजोगाईच्या शासकीय रुग्णालयात दाखल करण्यात आले आहे, अशी माहिती किनगाव पोलिसांनी दिली. या घटनेची नोंद करण्याची प्रक्रिया सुरु होती.