लातूर शहरात भरधाव टमटमची दुचाकीला धडक; तिघे जण जखमी

चालकावर गुन्हा : पाण्याची टाकी येथील घटना

लातूर : भरधाव टमटमने दिलेल्या धडकेत तिघे जण जखमी झाल्याची घटना लातूर शहरातील बार्शी मार्गावरील पाण्याची टाकी येथे घडली. याबाबत एमआयडीसी पाेलीस ठाण्यात गुन्हा दाखल करण्यात आला असल्याची माहिती पोलिसांनी रविवारी दिली. 

पाेलिसांनी सांगितले, फिर्यादी सुवर्णा भागवत जाधव (वय ३८ रा. गाढवेवाडी ता. औसा) हे पती आणि मुलासाेबत माेटारसायकलवरुन (एम.एच. २४ ए.एम. ८७१२) जात हाेते. दरम्यान, गंजगाेलाईच्या दिशेने जात असताना अज्ञात टमटमच्या चालकाने हायगय व निष्काळजीपणे वाहन चालवत माेटारसायकलला पाठीमागून जोराची धडक दिली. या अपघातामध्ये फिर्यादी, पती आणि त्यांचा मुलगा जखमी झाला आहे.

याबाबत पाेलिसांना दिलेल्या जबाबावरुन एमआयडीसी पाेलीस ठाण्यात टमटम चालकाविराेधात गुन्हा दाखल करण्यात आला आहे. तपास सहायक पोलीस उपनिरीक्षक मुळे करत आहेत.