अनोळखी तरुणाच्या मृतदेहावर पोलिसांनीच केले अंत्यसंस्कार! लातुरातील घटना

मृतदेह कुजलेल्या अवस्थेत असल्याने अखेर एका सेवाभावी संस्थेच्या मदतीने गांधी चाैक पाेलीस ठाण्याच्या पाेलिसांनी मृतदेहावर २६ ऑक्टाेबर राेजी अंत्यसंस्कार केले.

लातूर : एका ३५ वर्षीय तरुणाचा मृतदेह कुजलेल्या अवस्थेत आढळून आल्याची घटना घडली आहे. हा मृतदेह २५ ऑक्टोबर रोजी लातुरातील गंजगाेलाई व्यापारी संकुलाच्या दुसऱ्या मजल्यावरील पायऱ्यावर आढळून आला. याबाबत गांधी चाैक पाेलीस ठाण्यात नाेंद करण्यात आली असून, पाेलिसांनी तरुणाची ओळख पटविण्याचा प्रयत्न केला. मात्र, अद्याप ओळख पटली नाही. मृतदेह कुजलेल्या अवस्थेत असल्याने अखेर एका सेवाभावी संस्थेच्या मदतीने गांधी चाैक पाेलीस ठाण्याच्या पाेलिसांनी मृतदेहावर २६ ऑक्टाेबर राेजी अंत्यसंस्कार केले.

पाेलिसांनी सांगितले, पाेलीस निरीक्षक प्रेमप्रकाश माकाेडे यांनी दिलेल्या माहितीनुसार, लातूर शहरातील गंजगाेलाई येथील संकुलाच्या वरच्या मजल्यावरील टेरेसवर जाणाऱ्या पायऱ्यावर एका ३५ वर्षीय अनाेळखी तरुणाचा मृतदेह कुजलेल्या अवस्थेत २५ ऑक्टाेबर राेजी आढळून आला. मृतदेह कुजल्याने दुर्गंधी सुटलेली हाेती. दरम्यान, मयत तरुणाच्या अंगात पांढऱ्या रंगाचा लाईनिंगचा शर्ट असून, ताे उजव्या मनगटापर्यंत माेकळा आहे. तसेच त्याच्या अंगात हाफ पांढऱ्या रंगाची बनियन असून, अंगात निळ्या रंगाची जुनी वापरती जीन्स पॅन्ट आहे. चाॅकलेटी रंगाची अंडरवियर आहे. कमलेला लाल रंगाचा करदाेरा असून, पायात ग्रे आणि काळ्या रंगाचे साॅक्स आहेत.

मयताच्या डाेक्याला काळे केस असून, चेहरा गाेल आहे. नाक आखूड, बसके आहे. मयताने दाढी, मिशा ठेवलेले आहेत. मयत तरुणाच्या जवळ दाुरच्या ९० एमएलच्या बाटल्या, एक स्टीलचा जेवणाचा डबा, कमरेचा बेल्ट अशा वस्तू आढळून आल्या आहेत. याबाबत पाेलीस नाईक गाेपाळ देवकते यांनी दिलेल्या माहितीनुसार गांधी चाैक पाेलीस ठाण्यात नाेंद करण्यात आली आहे.