भरधाव ट्रॅव्हल्सच्या धडकेत बालक ठार; वडील गंभीर जखमी

लातूर तालुक्यातील भोईसमुद्रगा येथील संतोष करवंजे हे आपल्या मुलासमवेत दुचाकीवरून लातूरला आले होते.

लातूर - भरधाव वेगातील ट्रॅव्हल्सने मंगळवारी सायंकाळी ५.३० वाजेच्या सुमारास अशोक हॉटेल चौकात दुचाकीला जोरात धडक दिली. या अपघातात दुचाकीवरील ८ वर्षीय बालक ठार झाला असून, त्याचे वडील गंभीर जखमी झाले आहेत. 

लातूर तालुक्यातील भोईसमुद्रगा येथील संतोष करवंजे हे आपल्या मुलासमवेत दुचाकीवरून लातूरला आले होते. मंगळवारी सायंकाळी ५.३० वाजण्याच्या सुमारास गांधी चौकातून ते शिवाजी चौकाकडे निघाले होते. दरम्यान, अशोक हॉटेल चौकात सिग्नल पडले. यावेळी त्यांनी आपली दुचाकी थांबविली. मात्र मागून भरधाव वेगात येणाऱ्या ट्रॅव्हल्सने (एमएच ४४ यू ०१५७) दुचाकीला जोराची धडक दिली. या अपघातात दुचाकीवरील मनीष संतोष करवंजे (८) हा मुलगा गंभीर जखमी झाला. शिवाय, वडील संतोष करवंजे हेही जखमी झाले. घटनास्थळावरील प्रत्यक्षदर्शींनी दोघांनाही एका खासगी रुग्णालयात दाखल केले. उपचारादरम्यान मनीषचा मृत्यू झाला. तर संतोष करवंजे यांच्यावर उपचार सुरू असल्याचे पोहेकॉ. चंद्रकांत बिराजदार यांनी सांगितले. 

दरम्यान, याबाबत शिवाजीनगर पोलीस ठाण्यात आकस्मात मृत्यूची नोंद करण्यात आली असून, ट्रॅव्हल्स चालकाला पोलिसांनी ताब्यात घेतले आहे.