भाविकानं साईंचरणी अर्पण केल्या 2 किलो सोन्याच्या पादुका

शिर्डी, दि. 8 - गुरुपौर्णिमेनिमित्त एका साईभक्त दाम्पत्यानं शिर्डीतील साईबाबांच्या चरणी तब्बल 2 किलो सोन्याच्या पादुका अर्पण केल्या आहेत. ""एबीपी माझा""ने दिलेल्या वृत्तानुसार, आग्रा येथील रहिवासी अजय गुप्ता आणि संध्या गुप्ता या दाम्पत्यानं या 2 किलो सोन्याच्या पादुका अर्पण केल्या आहेत.  साईभक्त असलेल्या गुप्ता दाम्पत्यानं यापूर्वी साईंच्या चरणी 70 किलो चांदींचे सिंहासन अर्पण केले होते. 

 

यापूर्वी साईंच्या चरणी मंदिरासाठी सोन्याचा कळस, सुवर्ण सिंहासन, साई समाधीसाठी सोन्याचे कठडेही दान करण्यात आले आहेत.  शिर्डीतील साईबाबांना प्रत्येक उत्सवात मोठ्या प्रमाणात सोनेचांदीच्या वस्तू दान स्वरुपात येतात. यंदादेखील गुरूपौर्णिमेनिमित्त  भाविकांनी अनेक सोन्या-चांदीच्या वस्तू साईंचरणी अर्पण केल्या आहेत. 

 

 

 

तर,  मे महिन्यात विरारच्या ओम साईधाम ट्रस्टने शिर्डीजवळ उभारलेल्या साई पालखी निवाऱ्यातील दोन इमारती साईबाबा संस्थानला देणगी स्वरुपात दिल्या आहेत. सरकारी दरानुसार या इमारतींची बत्तीस कोटींहून अधिक किंमत आहे. संस्थानच्या इतिहासातील ही दुसऱ्या क्रमांकाची मोठी देणगी ठरणार आहे.

 

डॉ. सुरेश हावरे यांच्या अध्यक्षतेखालील संस्थानचे व्यवस्थापन मंडळ या इमारतीत राज्यातील गोर-गरीब, आदिवासी, वंचित, दुर्बल विद्यार्थ्यांसाठी आय. ए. एस. अकादमी सुरू करणार आहे. विरारच्या ओम साईधाम मंदिर ट्रस्टने शिर्डीला येणाऱ्या पदयात्रींसाठी शिर्डीजवळ २००८ मध्ये साईपालखी निवारा उभारला आहे. येथे पदयात्रींना निवास व भोजनाची मोफत सेवा पुरवण्यात येते़ आमदार हितेंद्र ठाकूर संस्थापक अध्यक्ष असलेल्या या ट्रस्टमध्ये काशिनाथ गोविंद पाटील, शेखर नाईक, प्रदीप तेंडोलकर, मोहन मुदलियार आदी विश्वस्तांचा समावेश आहे.

 

यातील पाटील (रा. कोपरी, तालुका वसई, जिल्हा पालघर) यांनी त्यांच्या नावावरील एकूण ९७८२.४४ चौ़मीटर बांधीव क्षेत्र असलेल्या साई पालखी निवाऱ्यातील दोन इमारती साईचरणी अर्पण केल्या. या इमारतींची सरकारी भावाप्रमाणे सुमारे ३२ कोटी २७ लक्ष १३ हजार रूपये किंमत आहे. या दानपत्रासाठीचे नोंदणी व मुद्रांक शुल्क १ कोटी ६३ लाख रूपये संस्थानने भरले. याशिवाय लवकरच कसारा घाटात पालखी थांबा उभारण्यासाठीही ३२ गुंठे जागा बाबांना अर्पण करणार असल्याचे तेंडोलकर यांनी सांगितले. संस्थानचे विश्वस्त सचिन तांबे यांच्या हस्ते प्रथम हे दानपत्र समाधीवर ठेऊन नंतर संस्थानच्या कार्यकारी अधिकारी रुबल अग्रवाल यांच्याकडे सुपूर्द करण्यात आले.