एक्स्प्रेस वेवर अपघातात ७ ठार

सातारा जिल्ह्यातील धोंडेवाडी या आपल्या गावी गणेशोत्सवासाठी गेलेल्या कोपरखैरणेतील धोंडे कुटुंबावर सोमवारी काळाने घाला घातला.

खालापूर : सातारा जिल्ह्यातील धोंडेवाडी या आपल्या गावी गणेशोत्सवासाठी गेलेल्या कोपरखैरणेतील धोंडे कुटुंबावर सोमवारी काळाने घाला घातला. मुंबईला परतताना मुंबई-पुणे एक्स्प्रेस वेवर लोधिवलीजवळ झालेल्या भीषण अपघातात या कुटुंबातील सात जण ठार झाले. मृतांमध्ये चार महिला व दोन लहान मुलांचा समावेश असून, अन्य दोन जण गंभीर जखमी झाले आहेत. अत्यवस्थ अवस्थेत असलेल्या या दोघांवर नवी मुंबईतील एमजीएम रुग्णालयात उपचार सुरू आहेत.
गावावरून नवी मुंबईत येत असताना खालापूरमधील लोधिवली गावाजवळ सोमवारी दुपारी दीड वाजण्याच्या सुमारास भरधाव वेगातील क्वॉलिस गाडीचे टायर फुटले आणि गाडी पुण्याकडून मुंबईकडे जाणाऱ्या मार्गावर जाऊन डम्परवर आदळली.
अपघातानंतर लगेचच घटनास्थळी दाखल झालेले पत्रकार व अपघातग्रस्तांना नेहमी मदत करणारे गुरुनाथ साठेलकर यांनी गाडीतील छिन्नविछिन्न अवस्थेतील मृतदेह बाहेर काढल्यानंतर क्रे नच्या साहाय्याने गाडी बाजूला करण्यात आली. या अपघाताची नोंद खालापूर पोलीस ठाण्यात करण्यात आली आहे.