सिन्नर-शिर्डी रस्त्यावर अपघात

सिन्नर-शिर्डी रस्त्यावर जीप व टेम्पो यांची समोरासमोर धडक होऊन झालेल्या अपघातात तीन जण ठार तर अन्य ८ जण जखमी झाले.

नाशिक : सिन्नर-शिर्डी रस्त्यावर जीप व टेम्पो यांची समोरासमोर धडक होऊन झालेल्या अपघातात तीन जण ठार तर अन्य ८ जण जखमी झाले. मृत ठाणे जिल्ह्यातील असून त्यात दोन महिलांचा समावेश आहे. वावी-पांगरी गावांदरम्यान शिंदे वस्तीजवळ शनिवारी मध्यरात्री साडेबाराच्या सुमारास हा अपघात झाला.
कोशिंबी ता. भिवंडी (जि.ठाणे) येथील १७-१८ जण देवदर्शनासाठी पिकअप जीप घेऊन शिर्डीच्या दिशेने निघाले होते. सिन्नरच्या पुढे गेल्यावर समोरुन येणाऱ्या डाक पार्सलच्या टेम्पोसमवेत या जीपची टक्कर झाली. त्यानंतर जीप उजव्या बाजूला रस्त्याच्या कडेला असणाऱ्या खोल गटारात उलटली.
रात्रीच्या अंधारात जखमी महिला व लहान मुले यांचे रडणे व किंकाळ्यांमुळे घटनास्थळी मोठा गोंधळ उडाला. यावेळी अन्य वाहनचालकांनी घटनेची माहिती वावी पोलिसांना दिली. पोलीस आणि स्थानिक ग्रामस्थांनी रुग्णवाहिका व खासगी वाहनांनी जखमींना सिन्नरच्या खासगी रुग्णालयात नेले.
या अपघातात ज्ञानेश्वर नामदेव ठाकरे (३०), नेहा ज्ञानेश्वर ठाकरे (२७) दोघेही रा. कोशिंबी ता. भिवंडी या दाम्पत्यासह योगिता संतोष चौधरी (२५) रा. आडगाव, ता. शहापूर हे तिघेजण ठार झाले. तर अनिल बबन पालवी, अंजना अनिल पालवी, राम गणपत सपाट, ज्ञानेश्वर कान्हु शिंदे, उमेश परशुराम ठाकरे, गणेश विष्णू चौधरी, अजय राम सपाट हे जखमी झाले. अन्य एक गंभीर जखमी असून त्यास नाशिकच्या खासगी रुग्णालयात दाखल करण्यात आले आहे. (प्रतिनिधी)