कोल्हापूरातील जवानाचा राजस्थानमध्ये अपघाती मृत्यू

खेबवडे (ता. करवीर) येथील संग्राम दिनकर चौगले (वय २३) या जवानाचा राजस्थान येथे रस्ते अपघातात मृत्यू झाल्याचे वृत्त आहे. सहा महिन्यापूर्वीच या जवानाचे लग्न झाले होते.

ऑनलाइन लोकमत
बाचणी, दि. 01- खेबवडे (ता. करवीर) येथील संग्राम दिनकर चौगले (वय २३) या जवानाचा राजस्थान येथे रस्ते अपघातात मृत्यू झाल्याचे वृत्त आहे. सहा महिन्यापूर्वीच या जवानाचे लग्न झाले होते. संग्राम दिवाळीनिमित्त गावी सुटीवर आला होता. पण दिवाळीच्या पहिल्याच दिवशी २९ आॅक्टोबरला त्याला सेवेवर बोलावून घेण्यात आले. दरम्यान त्याच्यावर काळाने घाला घातला
संग्रामचा जन्म २९ मे १९९३ रोजी झाला. त्याचे वडील वेल्डिंगचे काम तर आई घरकाम करते. त्याची कौटुंबिक परिस्थिती बेताचीच होती. त्याचे दहावीपर्यंत शिक्षण सन २००९ ला खेबवडे हायस्कूलमध्येच झाले. १२ वी विज्ञानचे शिक्षण शाहू कनिष्ठ महाविद्यालय येथे झाले. बारावी नंतर तो हैद्राबाद येथे लष्करात आर्टिलरी सेंटरमध्ये २०११ मध्ये भरती झाला. त्यानंतर पाच वर्षे सेवा झालेल्या संग्रामचा कागल तालुक्यातील बेलवळे खुर्द या गावातील सोनाली ज्ञानदेव जाधव हिच्याशी १२ एप्रिल २०१६ रोजी विवाह झाला होता. लग्नानंतर तो सेवा बजावण्यासाठी पुन्हा रूजू झाला. लग्नानंतरची पहिली दिवाळी साजरी करण्यासाठी तो दहा दिवसाच्या सुट्टीवर आला होता. मात्र दिवाळीच्या पहील्याच दिवशी २९ आॅक्टोबर रोजी त्याला सेवेवर हजर राहण्याचा आदेश मिळाल्याने तो तत्काळ कर्तव्य बजावण्साठी जात असतानाच त्याचा अपघातात मृत्यु झाला. संग्रामचा भाऊही लष्करात कार्यरत आहे. दरम्यान, या घटनेची उशीरापर्यंत गावासह त्याच्या घरापर्यंत काहीच माहीती नव्हती.