अकोल्यात एकाच कुटुंबातील पाच जणांनी केली आत्महत्या

अकोला जिल्ह्यातील आस्टूल येथे एकाच कुटुंबातील पाच जणांनी आत्महत्या केल्याची दुर्दैवी घटना मंगळवारी सकाळी घडली.

ऑनलाइन लोकमत

अकोला, दि. २१ - अकोला जिल्ह्यातील आस्टूल येथे एकाच कुटुंबातील पाच जणांनी आत्महत्या केल्याची दुर्दैवी घटना मंगळवारी सकाळी घडली. पती, पत्नी व त्यांची तीन लहान मुले असे पाच जणांचे मृतदेह शेतात गळफास घेतलेल्या स्थितीत आढळले असून आत्महत्येचे नेमके कारण अद्याप समजू शकलेले नाही. 

पातूर तालुक्यातील आस्टूल येथे संजय इंगळे (वय ४५) व त्यांची पत्नी मनीषा इंगळे (वय ३५) हे दाम्पत्त्य राहत होते. इंगळे दाम्पत्त्याला तीन मुलं असून मुलगी ऐश्वर्या (वय १९) ही आयटीआयचे शिक्षण घेत होती.मयूरी (वय १७)  ही दहावीत शिकत होती तर मुलगा रोशन (वय १५) हा नववी इयत्तेत शिकत होता. इंगळे यांची गावात सामायिक शेती होती. मंगळवारी सकाळी संजय, मनीषा  या दोघांचे मृतदेह शेतातील एका झाडावर गळफास घेतलेल्या स्थितीत आढळले. तर ऐश्वर्या व मयूरीचे मृतदेह दोन वेगवेगळ्या ठिकाणी जमिनीवर पडलेले आढळले.रोशनचा मृतदेह शेतातील दुस-या आंब्याच्या झाडावर गळफास घेतलेल्या स्थितीत आढळला आहे. या पाचही जणांनी आत्महत्या केल्याचा प्राथमिक अंदाज आहे. मात्र मुलींचे मृतदेह जमिनीवर आढळल्याने ही आत्महत्या आहे की अन्य काही प्रकार आहे असा संशय ग्रामस्थ व्यक्त करत आहे. पातूर पोलिस या घटनेचा तपास करत आहे.