Maharashtra Political Crisis: “ये दोस्ती हम नहीं तोडेंगे... एकनाथ शिंदे-देवेंद्र फडणवीस महाराष्ट्राची दोन ‘अनमोल रत्न’”

Maharashtra Political Crisis: अमृता फडणवीसांनी मैत्री दिनाचे औचित्य साधत एक फोटो सोशल मीडियावर शेअर करत पुन्हा शिवसेनेला डिवचल्याचे सांगितले जात आहे.

Maharashtra Political Crisis: मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस (Devendra Fadnavis) यांनी शपथ घेऊन सव्वा महिना लोटला तरी अद्याप मंत्रिमंडळ विस्ताराचा पत्ता नाही. यावरून विरोधक शिंदे-भाजप सरकारवर सातत्याने निशाणा साधत आहेत. यातच मैत्री दिनाच्या निमित्ताने देवेंद्र फडणवीस यांच्या पत्नी अमृता फडणवीस (Amruta Fadnavis) यांनी सोशल मीडियावर एकनाथ शिंदे आणि देवेंद्र फडणवीस यांच्यासोबतचा एक फोटो शेअर करत, महाराष्ट्राची दोन अनमोल रत्न असल्याचे म्हटले आहे. 

अमृता फडणवीस आणि शिवसेनेमधील वैर राजकीय वर्तुळाला नवीन नाही. मुख्यमंत्रिपदावरून उद्धव ठाकरे यांना पायऊतार व्हावे लागल्यानंतर त्यांनी कशी नशिबाने थट्टा मांडली गाण्याचा उल्लेख करत डिवचण्याचा प्रयत्न केला होता. आता त्यांनी मुख्यमंत्री एकनाथ शिंदे यांच्यासोबतचा फोटो शेअर करत पुन्हा एकदा शिवसेनेला डिवचण्याचा प्रयत्न केला आहे. यातच फ्रेंडशिप डेच्या निमित्ताने या दोघांचा फोटो शेअर करत दिलेले कॅप्शन लक्षवेधी ठरत आहे. 

महाराष्ट्राच्या दोन अनमोल रत्नांसोबत

एकनाथ शिंदे आणि देवेंद्र फडणवीस दिल्लीत आहेत. अमृता फडणवीस यांनी फ्रेंडशीप डेच्या औचित्याने  #friendshipday हॅशटॅग करत मुख्यमंत्री आणि उपमुख्यमंत्र्यांचा फोटो सोशल मीडियात पोस्ट केला आहे. मात्र, फोटोला दिलेल्या कॅप्शनने चांगलेच लक्ष वेधले आहे. अमृता फडणवीस यांनी पोस्ट करताना म्हटले आहे की, ये दोस्ती हम नही तोड़ेंगे, महाराष्ट्राच्या दोन अनमोल रत्नांसोबत. यामध्ये त्यांनी एकनाथ शिंदे आणि फडणवीस यांना टॅग केले आहे.

दरम्यान, बस बाई बस कार्यक्रमामध्ये अमृता फडणवीस यांना नशिबान थट्टा मांडली हे गीत ऐकवण्यात आले होते. ते ऐकल्यानंतर कोणत्या व्यक्तीचे नाव समोर येते? असा प्रश्न सुबोध भावे यांनी त्यांना विचारला. यावर, अमृता फडणवीस यांनी उद्धव ठाकरे यांचे नाव घेतले होते. अमृता फडणवीस यांनी केलेल्या टीकेनंतर मुंबईच्या माजी महापौर किशोरी पेडणेकर यांनी अमृता फडणवीस यांना गाण्यातून टोला लगावला.