मीरा भाईंदर महापालिकेचा आणखी एक टीडीआर गैरप्रकार 

पालिकेने स्थगिती दिली आणि पालिकेनेच टीडीआर वापरायला दिली परवानगी

लोकमत न्यूज नेटवर्क

मीरारोड - महापालिका आरक्षणाच्या जागेच्या मोबदल्यात दिलेला टीडीआर वापरण्यास पालिकेने स्थगिती दिली असताना दुसरीकडे त्याच टीडीआर वापराच्या आधारे विकासकास बांधकाम परवानगी दिल्याचा मीरा भाईंदर महापालिकेचा आणखी एक घोटाळेबाज कारभार समोर आला आहे. 

मौजे नवघर येथील सर्वे क्र ४०९ / ६अ या पालिका आरक्षण क्रमांक २५८ व विकास आराखड्यातील रस्ता बाधित जागेसाठी अशोक गोयल यांनी सल्लागार अभियंता अनिस अँड असोसिएट मार्फत सादर करारनामा व प्रस्ताव नुसार सातबारा नोंदी फेरफार होऊन महापालिकेचे नाव लागले होते. त्या नंतर महापालिकेने २२१५ चौरस मीटर इतक्या क्षेत्राचा टीडीआर १७ मार्च २००७ रोजीच्या विकास हक्क प्रमाणपत्र क्र. १२५ नुसार दिला होता. परंतु जागेची मालकी अधिकार गोयल यांचे नसल्याने  उपविभागीय अधिकारी यांनी घेतलेल्या सुनावणी नंतर महापालिकेच्या नावे जमीन झाल्याचा फेरफार रद्द केला होता.  उपविभागीय अधिकारी यांच्या निर्णयाचे पत्र महापालिकेस मिळाल्या नंतर ७ एप्रिल २००७ रोजी पालिकेने टीडीआर वापरण्यास स्थगिती दिली. 

धक्कादायक बाब म्हणजे विकास हक्क प्रमाणपत्र वापरण्यास पालिकेनेच स्थगिती दिली असताना देखील मौजे गोडदेव सर्वे क्र. ३१२ / ४, ५ व ३२५ / २ ह्या जागेत त्या स्थगित टीडीआरचा वापर करून  १४ ऑक्टोबर २००८ रोजी महापालिकेच्या नगररचना कडूनच बांधकाम परवानगी दिली गेली . 

या प्रकरणी तक्रारी होत असताना १५ ऑक्टोबर २०१५ रोजीच्या तत्कालीन आयुक्त अच्युत हांगे यांनी विकासक सेव्हन इलेव्हन कंस्ट्रक्शन व वास्तुविशारद डी. एन. पटेल असोसिएट ला दिलेल्या पत्रात ,   सदर बांधकाम परवानगीस स्थगिती देत अन्य विकास हक्क प्रमाणपत्राचा वापर करून नव्याने प्रस्ताव सादर करण्यास तसेच ७ दिवसात खुलासा सादर न केल्यास कार्यवाहीचा इशारा आयुक्तांनी दिला होता. त्या आधी १२ मे २०१५ रोजीच्या तत्कालीन नगररचनाकार दिलीप घेवारे यांनी अशोक गोयल व अनिस असोसिएट यांना पत्र देऊन खुलासा मागवत कारवाईचा इशारा दिला होता. 

परंतु प्रत्यक्षात मात्र महापालिकेने कोणतीच ठोस कारवाई केली नाही. स्थगित टीडीआर वापरल्याने गुन्हा दाखल करण्यासह वाढीव परवानगी रद्द करणे तसेच वाढीव बांधकाम थांबवणे व तोडून टाकणे आवश्यक असताना महापालिकेने तसे काही केलेच नाही उलट इमारत बांधकाम पूर्ण होऊ दिले असे आरोप होत आहेत. 

 या प्रकरणी रश्मी प्रॉपर्टीज व त्यांच्या प्रतिनिधी आणि वकिलां मार्फत तक्रारी केल्या आहेत. तरी देखील महापालिकेने सदर गैरप्रकारांना पाठीशी घालणे सुरूच ठेवले आहे. रामदेव पार्क जवळ हिया रिजन्सी या नावाने इमारत बांधून पूर्ण झाली आहे. यामुळे खरेदीदार नागरिकांची फसवणूक पालिकेने होऊ दिल्याचा आरोप होत आहे. तर सदर इमारतीच्या वाढीव बांधकामास पालिकेने भोगवटा दाखला दिलेला नाही असे उत्तर महापालिकेचे सहायक संचालक नगगरचना हेमंत ठाकूर यांनी २३ जुलै रोजी तक्रारदारास दिले आहे.