बहुरंगीसह सतरा लढतींकडे सोलापूर शहरवासीयांचे लक्ष

बहुरंगीसह सतरा लढतींकडे सोलापूर शहरवासीयांचे लक्ष
सोलापूर: विधानसभा निवडणुकीची प्राथमिक चाचणी समजल्या जाणाऱ्या सोलापूर महापालिका निवडणुकीमध्ये २६ प्रभागात तुल्यबळ लढती आहेत़ बहुतांश ठिकाणी बहुरंगी लढती होत आहेत; मात्र १७ ठिकाणी ‘व्हीआयपी’ उमेदवार असल्यामुळे या लढतींची विशेष उत्सुकता लागली आहे़
पालकमंत्री विजयकुमार देशमुख यांनी मुलगा डॉ़ किरण यांना शेळगी परिसराचा समावेश असलेल्या प्रभाग दोनमध्ये उभे केले असून या ठिकाणी काँग्रेसचे केदार उंबरजे यांच्याबरोबर त्यांचा सामना होत आहे़ विद्यमान नगरसेवक चंद्रकांत रमणशेट्टी यांचा पत्ता कट करून डॉ़ किरण यांना उमेदवारी दिली़ त्यामुळे हार-जीत कोणाची, याकडे शहराचे लक्ष लागले आहे़ प्रभाग सातमध्ये पारंपरिक विरोधकांमध्ये तुल्यबळ लढती आहेत़ या ठिकाणी माजी उपमहापौर राष्ट्रवादीचे नाना काळे हे सेनेचे अमोल शिंदे यांच्या विरोधात तर राष्ट्रवादीचे दुसरे उमेदवार मनोहर सपाटे यांच्या विरोधात सेनेचे देवेंद्र कोठे आणि भाजपकडून श्रीकांत घाडगे लढत आहेत. त्यामुळे या ठिकाणी पॅनल टू पॅनल कोणाचा लागणार यावर पैजा लागल्या आहेत़ काँग्रेसने या ठिकाणी नवे चेहरे दिले आहेत़
महापौर सुशीला आबुटे यांच्या विरोधात भाजपच्या संगीता जाधव उभ्या राहिल्या असल्यामुळे या प्रभाग २४ च्या लढतीकडे विशेष लक्ष लागले आहे़ राष्ट्रवादीचे हारुन शेख आणि एमआयएमचे तौफिक शेख तसेच काँग्रेसच्या माजी महापौर नलिनी चंदेले आणि भाजपच्या मोहिनी पतकी यांची प्रभाग २१ मधील लढत देखील लक्षवेधी ठरली आहे़ प्रभाग सहामधून दिलीप कोल्हे यांना सेनेचे युवा नेते गणेश वानकर यांनी आव्हान दिले आहे़ प्रभाग १४ मध्ये काँग्रेसचे पॅनल तगडे असले तरी माजी महापौर आरिफ शेख यांनी बंडखोरी करून भाजपकडून तिकीट मिळविले. त्यामुळे या ठिकाणी नक्की काय होणार, याची उत्सुकता लागली आहे़
विडी घरकूल परिसराचा समावेश असलेल्या प्रभाग १० मध्ये प्रथमेश कोठे तर ११ मध्ये त्यांचे वडील महेश कोठे उभे आहेत़ या ठिकाणी प्रथमेशच्या विरोधात भाजपचे रवी नादरगी उभे आहेत तर महेश कोठेंच्या विरोधात बसवराज बिराजदार लढत देत आहेत़ प्रभाग १२ मध्ये सेनेचे विनायक कोंड्याल यांचा सामना राष्ट्रवादीचे माजी महापौर राजेंद्र कलंत्री यांच्याशी होत आहे़ सेनेकडून तिकीट कट झालेल्या महिला सेना आघाडीच्या प्रमुख अस्मिता गायकवाड यांनी बंडखोरी करून सेनेच्या विरोधात उमेदवारी ठेवली आहे़ भाजपच्या देवी झाडबुके, सेनेच्या नम्रता निंबाळकर आणि काँग्रेसच्या संजीवनी कुलकर्णी यांच्याशी त्यांचा सामना आहे़
प्रभाग पाचमध्ये बसपाचे आनंद चंदनशिवे, राष्ट्रवादीचे मनोज गादेकर, सेनेचे विष्णू निकंबे, भाजपचे बिज्जू प्रधाने, काँग्रेसचे कुणाल बाबरे आदींची लढत देखील चर्चेचा विषय बनली आहे़ कामगार नेते म्हणून राज्यभर प्रसिद्ध असलेले माजी आमदार आडम मास्तर यांनी पत्नी कामिनी आडम यांना प्रभाग १३ मधून उभे केले आहे़ इथे काँग्रेसच्या राधा होमकर आणि सेनेच्या शिवम्मा बंदपट्टे उभ्या आहेत़ आडम मास्तर यांची कन्या अरुणा आडम-गेंट्याल या देखील उभ्या असल्यामुळे आडम मास्तरातील घराणेशाही आता राजकारणात सक्रिय झाल्याचे दिसते़
नातेवाईकांचा प्राधान्य
४ज्यांनी आजवर कोणत्याही व्यासपीठावर राजकीय अस्तित्व दाखविले नाही अशा अनेक नेत्यांनी आपल्या मुलास, पत्नीला निवडणूक रिंगणात उभे केले आहे़ पालकमंत्री विजयकुमार देशमुख यांनी मुलाला उभे केले तर कामगार नेते आडम मास्तर यांनी आपल्या पत्नीला आणि मुलीला उमेदवारी दिली़ महेश कोठे यांनी आपल्या मुलाला तसेच पुतण्यास, बहिणीस उमेदवारी दिली आहे़ माजी खासदार कै. लिंगराज वल्याळ यांचे चिरंजीव नागेश, माजी आमदार शिवशरण पाटील यांनी अमरजीत तसेच भावजय यांना भाजप तिकीट मिळविले आहे़ माजी आमदार प्रकाश यलगुलवार यांचा मुलगा मनोज देखील नशीब अजमावित आहे़ महिला आरक्षण निघाल्यामुळे अनेकांनी आपल्या घरातील उमेदवार दिला आहे़