बेस्टच्या धडकेत बाइकस्वार ठार!

बेस्ट बसने बाइकला दिलेल्या धडकेत एका २२ वर्षीय तरुणाचा मृत्यू झाला. मालाडमध्ये मंगळवारी संध्याकाळी हा प्रकार घडला.

गौरी टेंबकर-कलगुटकर / मुंबई
बेस्ट बसने बाइकला दिलेल्या धडकेत एका २२ वर्षीय तरुणाचा मृत्यू झाला. मालाडमध्ये मंगळवारी संध्याकाळी हा प्रकार घडला. मालवणी पोलिसांनी बस चालकाला अटक केली आहे.
साबीर खान असे या मयत तरुणाचे नाव आहे. तो मंगळवारी त्याचा मित्र सोनू याच्यामागे बाइकवर बसून मढ फिरण्यासाठी गेला होता. संध्याकाळी साडेसहाच्या सुमारास हे दोघे मालवणीतील घराच्या दिशेने परतत होते. त्याच वेळी रूट क्रमांक २६९ ची गोराई डेपोची बस बोरीवलीवरून मढच्या दिशेने जात होती. आक्सा गावाजवळ भरधाव वेगात असलेल्या बाइकला या बसची जोरदार धडक लागली. त्यामुळे बाइकवर बसलेले सोनू आणि साबीर हे गंभीररीत्या जखमी झाले. या प्रकरणी मालवणी पोलिसांनी तातडीने घटनास्थळी धाव घेत, या दोघांना स्थानिक रुग्णालयात दाखल केले.
मात्र, साबीरची स्थिती गंभीर असल्याने, त्याला मुंबई सेंट्रलच्या नायर रुग्णालयात हलविण्यात आले. बुधवारी उपचारादरम्यान त्याची प्राणज्योत मालवली, तर सोनूवर कांदिवलीतील आॅस्कर रुग्णालयात उपचार सुरू आहेत. त्याची स्थितीदेखील गंभीर असल्याचे तपास अधिकाऱ्यांनी सांगितले. मालवणी पोलीस ठाण्याचे वरिष्ठ पोलीस निरीक्षक दीपक फटांगरे यांनी दिलेल्या माहितीनुसार, या अपघातप्रकरणी बेस्ट बसचा चालक प्रदीप कास्टो (५२)वर गुन्हा दाखल करत, त्याला अटक केली आहे. जो मूळचा नालासोपाराचा रहिवासी आहे. दरम्यान, साबीरचा मृतदेह शवविच्छेदनासाठी पाठविण्यात आला आहे.