मरणासन्न अवस्थेत बिबट आढळला

बोरधरण, दि. 23- बोर व्याघ्र प्रकल्पाच्या सालई (पेवठ) शिवारातील नाल्यात बिबट दिसताच अनेकांची भंबेरी उडाली. ही घटना शुक्रवारी सकाळी घडली. या बिबटाची पाहणी केली असता तो मरणासन्न अवस्थेत होता. त्याला पिपल्स फॉर अ‍ॅनिमलच्या सदस्यांनी वनविभागाच्या कर्मचा-यांच्या मदतीने वर्धेच्या करूणाश्रमात आणले असून त्याच्यावर येथे उपचार सुरू आहे. 

वर्धेतील पिपरी (मेघे) येथील करूणाश्रमात डॉक्टरांच्या चमूने त्याची तपासणी केली असता त्याच्या शरीरात पाण्याची कमतरता असल्याचे दिसून आले. तसेच त्याला डायरीय झाल्याचे निष्पन्न झाले. त्याच्या रक्ताचे नमूने घेतले असून ते तपासणीकरिता पाठविण्यात आल्याचे करूणाश्रमाचे डॉ. संदीप जागे यांनी सांगितले. सध्या बिबटावर करूणाश्रमातील रुग्णालयात उपचार सुरू असल्याचे सांगण्यात आले आहे. 

शुक्रवारी सकाळी ६ वाजताच्या सुमारास सालई येथील शेतकरी विश्वनाथ कांबळे शेतात जात असताना त्यांना पुरूषोत्तम सावरकर यांच्या शेतालगतच्या नाल्यात बिबट बसून असल्याचे निर्दशनास आले. पण, बिबट काही हालचाल करत नव्हता. शेतक-याने याची माहिती वन विभागाच्या कार्यालयात भ्रमणध्वनीद्वारे कळविले. हिंगणीचे वनपरिक्षेत्राचे अधिकारी व बोर व्याघ्रचे वनपरीक्षेत्राचे अधिकारी नाल्याजवळ पोहचले. काही काळ त्या बिबटाचे निरीक्षण केल्यावर तो बिबट उभा ही होत नव्हता. त्यामुळे हा जखमी झाला असावा, असा संशय व्यक्त करण्यात आला. यावरून पिपल फॉर अनिमल्सला पाचारण करण्यात आले. पिपल्स फौर अ‍ॅनिमलच्या चमुने बिबट पकडण्यासाठी जाळे टाकले. मात्र त्या जाळ्याचा काही उपयोग झाला नाही. अखेर त्या बिबटला हाताने उचलून नाल्याच्या बाहेर काढून त्याला वाहनात टाकण्यात आले. तेथूनच उपचारासाठी वर्धेतील पिपरी येथील करूणाश्रमात आणण्यात आले. त्या बिबट्याचे वय अंदाजे ३ वर्षे असल्याचे सांगण्यात आले. गावापासून काही अंतरावर बिबटाचा वावर हा नित्याचा असल्याने शेतकºयासह मजुरामध्ये नेहमी भीतीचे वातावरण आहे. 

सालई, गोहदा, हिंगणी येथील नागरिकांसोबत महिलांची पाहण्याची एकच गर्दी केली होती. वनपरिक्षेत्र अधिकारी, हिंगणीचे पी.एम. झाडे, बोर व्याघ्र प्रकल्पाचे वनपरिक्षेत्र अधिकारी गायनेर, क्षेत्र सहायक हिंगणीचे कावळे, क्षेत्र सहायक बोर व्याघ्रप्रकल्पाचे फाटे, पिपल फॉर अनिमल्स करूणाश्रम वर्धाचे सुमित जैन, कौस्तुभ गावंडे, लखन येवले, सूरज सिंग, मंगेश येनोरकर, पवन दरणे, सालई पेवठ येथील पोलीस पाटील विनोद घाटोळे यांनी बिबट्याला पकडण्याकरिता सहकार्य केले.