"शिवसेना भ्रष्टाचाराच्या खड्ड्यात कोसळली असून या पक्षात आता थर उरलेच नाहीत"; भाजपाचं टीकास्त्र

BJP Atul Bhatkhalkar Slams Shivsena : बीड गर्भपात प्रकरणी एका महीलेचा मृत्यू झाला आहे. गोठ्यात गर्भपात करणाऱ्या संबंधित डॉक्टरांना खुनाचे कलम लावून अटक करावी, अशी मागणी देखील अतुल भातखळकर यांनी विधिमंडळ अधिवेशनात केली आहे.

मुंबई - शिंदे-फडणवीस (Devendra Fadnavis)  यांचे नवे सरकार आले. यानंतर भाजपने आता मुंबई महानगरपालिका निवडणुकांवर लक्ष्य केंद्रीत केले असून, भाजप मुंबई अध्यक्षपदाची सूत्रे हाती घेताच आशिष शेलार (BJP Ashish Shelar) यांनी वरळीत भव्य दहीहंडी उत्सवाचे (Dahi Handi 2022) आयोजन केले आहे. या खेळीने आशिष शेलार यांनी एकाच दगडात दोन पक्षी मारल्याचे सांगितले जात आहे. याच दरम्यान आता भाजपाने पुन्हा एकदा शिवसेनेवर टीकास्त्र सोडलं आहे. "शिवसेना भ्रष्टाचाराच्या खड्ड्यात कोसळली असून या पक्षात आता थर उरलेच नाहीत" असं म्हणत निशाणा साधला आहे. 

भाजपाचे नेते अतुल भातखळकर (BJP Atul Bhatkhalkar) यांनी "आमचे थर कोसळणार नाही हा शिवसेनेचा दावा योग्यच, कारण शिवसेना भ्रष्टाचाराच्या खड्ड्यात कोसळली असून या पक्षात आता थर उरलेच नाहीत. त्यांचा भ्रष्टाचार, त्यांचा उर्मटपणा, त्यांची मस्ती या सगळ्यांना मुंबईकर जनता यावेळच्या महानगरपालिकेच्या निवडणुकीतून उत्तर देणार आहे" असं म्हटलं आहे. तसेच "मुंबईत खड्ड्यांमुळे झालेल्या दुर्दैवी मृत्युला शिवसेनेचा महापालिकेतील भ्रष्टाचार कारणीभूत. काळया यादीतील निलंबित भ्रष्ट अभियंत्यांना पुन्हा कामावर घेऊन प्रमोशन दिले" असं म्हणत हल्लाबोल केला आहे. 

बीड गर्भपात प्रकरणी एका महिलेचा मृत्यू झाला आहे. गोठ्यात गर्भपात करणाऱ्या संबंधित डॉक्टरांना खुनाचे कलम लावून अटक करावी, अशी मागणी देखील अतुल भातखळकर यांनी विधिमंडळ अधिवेशनात केली आहे. TV9 मराठीशी संवाद साधताना त्यांनी असं म्हटलं आहे. आशिष शेलार यांनी देखील आदित्य ठाकरेंवर जोरदार हल्लाबोल केला आहे. "भाजपाच्या मतांवर निवडून यायचे आणि उगाच आमचा गड.. आमचा गड म्हणून मिरवायचे..." असं म्हणत निशाणा साधला आहे. आशिष शेलार यांनी आपल्या ट्विटर अकाऊंटवरून याबाबत एक ट्विट केलं आहे. "भाजपाच्या मतांवर निवडून यायचे आणि उगाच आमचा गड.. आमचा गड म्हणून मिरवायचे..." आता बघा कसे सगळे गडगडायला लागलेय. भगव्याशी गद्दारी करणाऱ्यांचे थर कोसळायला लागलेत... लवकरच... मुंबईकरच वरळीतून कोसळणाऱ्या थरांचा थरार निवडणूकीत "करुन दाखवतील" आमचं ठरलंय!!" असं म्हटलं आहे. 

"ज्या वरळीत सेनेच्या (?) खासदार, आमदार, माजी मंत्री, माजी महापौर आणि नगरसेवक असे नेत्यांचे थरावर थर आहेत, तिथे म्हणे  पक्षाला द्यायच्या 100 रूपयांच्या शपथपत्राला "बळ"  अपुरे पडतेय... दुसरीकडे भाजपाची जांबोरी मैदानातील दहिहंडी मुंबईकरांच्या प्रचंड प्रतिसादाने लक्षवेधी ठरतेय..." असं देखील आशिष शेलार यांनी म्हटलं आहे. भाजपने मुंबई महापालिका निवडणुकांच्या मोर्चेबांधणीची सुरुवात युवासेना प्रमुख आणि शिवसेना नेते आदित्य ठाकरे यांच्या वरळीतून केल्याचे सांगितले जात आहे. भाजपचा भव्य दहीहंडी उत्सव जांबोरी मैदानात हा उत्सव पार पडणार आहे.