Girish Mahajan : "तुम्हाला खूप वाटतं तुम्ही मुख्यमंत्री व्हावं पण…"; गिरीश महाजनांचा एकनाथ खडसेंना खोचक टोला

BJP Girish Mahajan Slams NCP Eknath Khadse : गिरीश महाजन यांनी राष्ट्रवादीचे नेते एकनाथ खडसे यांच्यावर जोरदार हल्लाबोल केला आहे.

भाजपाचे नेते गिरीश महाजन (BJP Girish Mahajan) यांनी राष्ट्रवादीचे नेते एकनाथ खडसे (NCP Eknath Khadse) यांच्यावर जोरदार हल्लाबोल केला आहे. "खडसेंना खूप वाटतं त्यांनी मुख्यमंत्री व्हावं, पण जनतेला ते वाटायला हवंना" असं म्हणत निशाणा साधला आहे. तसेच खडसेंनी एकदा आत्मपरीक्षण करावे असं महाजनांनी म्हटलं आहे. "भाजपा हा केवळ वाणी, ब्राह्मणांचा पक्ष नसून तो खडसे, मुंडे, महाजन यांचा बहुजनांचा पक्ष आहे, असं वक्तव्य एकनाथ खडसे यांनी केलं आहे. त्यांच्या विधानावर प्रतिक्रिया देताना गिरीश महाजन यांनी एकनाथ खडसेंना खोचक टोला लगावला आहे.

"एकनाथ खडसे जे बोलले ते बरोबरच बोलले. कोण म्हणतं आमचा पक्ष हा वाणी, ब्राह्मणांचा आहे. आमचा पक्ष मुळातच बहुजनांचा आहे. आमचे 105 आमदार असतील, आमच्याकडे इतक्या मोठ्या संख्येनं खासदार आहेत, एवढेच काय आमचे सर्व पदाधिकारी आणि मंत्री सुद्धा बहुजनांचं प्रतिनिधित्व करतात. त्यामध्ये कुठेही ब्राह्मण किवा वाणी समाजाची संख्या अधिक नाही. मात्र एकनाथ खडसेंनी बोलताना हे लक्षात घ्यावे, की माणूस हा नुसता जातीने आणि समाजामुळे मोठा होत नाही" असं गिरीश महाजन यांनी म्हटलं आहे.

"खडसेंनी एकदा आत्मपरीक्षण करावं"

"खडसेंनी एक लक्षात घ्यावं माणूस हा केवळ जाती, धर्मामुळे मोठा होत नाही तर तो त्याच्या अंगी असलेल्या गुणांमुळे आणि नेतृत्व क्षमतेमुळे मोठा होतो. कोणीही सांगेल, अवघा महाराष्ट्र सांगेल की देवेंद्र फडणवीस यांची क्षमता काय आहे ती? खडसेंना खूप वाटतं त्यांनी मुख्यमंत्री व्हावं, पण जनतेला ते वाटायला हवंना. त्यामुळे खडसेंनी एकदा आत्मपरीक्षण करावं. हा जगातला सर्वात मोठा पक्ष आहे" असं देखील गिरीश महाजन यांनी म्हटलं आहे. TV9 मराठीशी संवाद साधताना त्यांनी असं म्हटलं आहे.