'अति शहाणा त्याचा बैल रिकामा': निलेश राणेंचा राऊतांना टोला

भाजप-शिवसेनामध्ये सुरु असलेला वाद अधिकच वाढताना दिसत आहे.

मुंबई : विधानसभा निवडणुकीत एकत्र आलेले भाजप-शिवसेना पक्ष, निवडणुकीच्या निकालानंतर मात्र एकमेकांच्या विरोधात गेले आहेत. त्यामुळे या दोन्ही पक्षातील नेत्यांमध्ये आरोप-प्रत्यारोप सुरु असल्याचे पाहायला मिळत आहे. निलेश राणे यांनी शिवसेनेचे खासदार संजय राऊत यांच्यावर जहरी टीका केली आहे. 'संज्या तुझ्यासाठी मराठीत एक म्हण आहे.' “अति शहाणा त्याचा बैल रिकामा”, असा खोचक टोला निलेश राणे यांनी राऊत यांना लगावला आहे.

भाजप-शिवसेनामध्ये सुरु असलेला वाद अधिकच वाढताना दिसत आहे. आता या दोन्ही पक्षातील नेते एकमेकांवर तोंडसुख घेत आहे. रविवारी शिवसेनेचे आमदार अब्दुल सत्तार यांनी भाजपचे खासदार रावसाहेब दानवे यांच्यावर टीका केली होती. त्यांनतर काही तासाच्या आताच दानवे यांनी त्यांना प्रत्युत्तर दिले होते. त्यांनतर आता निलेश राणे यांनी संजय राऊत यांच्यावर टीका केली आहे.

माजी मुख्यमंत्री देवेंद्र फडणवीस यांनी ट्विट करुन बाळासाहेबांना अभिवादन करताना एक व्हिडिओ शेअर करत, शिवसेनेला हिंदुत्व आणि स्वाभिमानाची आठवण करून दिली होती. यावरूनच शिवसेना नेते संजय राऊत यांनी फडणवीसांवर निशाणा साधला होता. शिवसेनेला कुणीही शहाणपणा शिकवण्याची गरज नसल्याचे राऊत म्हंटले होते.

यावरून आता भाजप नेते निलेश राणे यांनी राऊतांवर घणाघाती टीका केली आहे. संज्या तुझ्यासाठी मराठीत एक म्हण आहे. “अति शहाणा त्याचा बैल रिकामा”, अशी जहरी टीका निलेश राणे यांनी केली आहे. त्यामुळे दोन्ही पक्षात सुरु असलेला वाद  वाढण्याची शक्यता आहे.