भाजप गुंडांचा पक्ष बनतोय - अजित पवार

पिंपरी, दि. 17 - पिंपरी चिंचवडच्या आगामी महानगरपालिका निवडणुकीच्या पार्श्वभूमीवर राष्ट्रवादीचे नेते आणि माजी उपमुख्यमंत्री अजित पवार यांनी भारतीय जनता पक्षावर जोरदार टीका केली. भाजप आता गुंडांचा पक्ष म्हणून ओळखला जाऊ लागला आहे. भाजपने सर्रास गुंडापुंडांनाही पक्षात प्रवेश दिले आहेत, असे अजित पवार पिंपरीत झालेल्या पत्रकार परिषदेत म्हणाले. 

भाजपने जाणीवपूर्वक उमेदवार आयात केले आहेत. भाजपने गुंडांचा पक्ष म्हणून ओळख निर्माण केली आहे, त्यामुळे गुंडांच्या प्रवेशावर राष्ट्रीय स्वयंसेवक संघ सुद्धा नाराज आहे, असे अजित पवार म्हणाले. आझम पानसरेंनी राष्ट्रवादी का सोडली याबाबत काही माहिती नाही, मात्र त्यांच्यावर राष्ट्रवादीने कोणताही अन्याय केला नाही, असेही ते म्हणाले.  

महानगर पालिकेच्या आगामी निवडणुकीसाठी आघाडीबाबत बोलताना अजित पवार म्हणाले की, सन्मानपूर्वक आघाडी झाल्यास आम्ही सकारात्मक निर्णय घेऊ. तसेच उमेदवारांची निवड करण्यासाठी अंतिम टप्प्यावर काही वेळ घेत आहोत. यावर सर्व कार्यकर्त्यांच्या आणि सहकाऱ्यांच्या सहमतीने निर्णय घेण्यात येईल. या ठिकाणी आम्ही चांगले काम केलं आहे. तसेच, आपणहून कुणाच्या वाटेला जाणार नाही आणि कुणी आमच्या वाटेला आलं तर बघ्याची भूमिका घेणार नाही. वेळेप्रसंगी आरे ला कारे करु, असेही यावेळी अजित पवार म्हणाले.