बिन टाक्याचं ऑपरेशन करणाऱ्या डॉक्टर बारामतीत आल्या तर...; गोपीचंद पडळकरांचा टोला

५० वर्ष खूप सेवा केली आता तुम्हाला आराम करण्याची सक्त गरज आहे. जनता २०२४ ला सुप्रिया सुळे यांना सक्तीच्या रजेवर पाठवणार आहे असं गोपीचंद पडळकरांनी सांगितले.

बारामती - भाजपाच्या केंद्रीय नेतृत्वानं लोकसभा मिशन हाती घेतलंय. त्यात निर्मला सीतारामन यांच्यावर बारामतीची जबाबदारी दिलीय. निर्मला सीतारामन या बिन टाक्याचं ऑपरेशन करणाऱ्या डॉक्टर आहेत. एकदा त्या बारामतीला आल्या तर पवारांना कळणारही नाही. ऑपरेशन कसं झाले आणि भाजपाचा खासदार दिल्लीला कसा गेला अशा शब्दात भाजपा आमदार गोपीचंद पडळकर यांनी राष्ट्रवादी अध्यक्ष शरद पवारांवर टीका केली आहे. 

गोपीचंद पडळकर म्हणाले की, २२,२३ आणि २४ सप्टेंबरला निर्मला सीतारामन महाराष्ट्रात येणार म्हटल्यावर सुप्रिया सुळे सातत्याने सरकारवर टीका करायला लागल्यात. तुम्ही चिंता करू नका. ५० वर्ष खूप सेवा केली आता तुम्हाला आराम करण्याची सक्त गरज आहे. जनता २०२४ ला सुप्रिया सुळे यांना सक्तीच्या रजेवर पाठवणार आहे. पुणे जिल्ह्यात भाजपाचं संघटन कार्यकर्त्यांनी टिकवून ठेवलं. २०१९ ला विश्वासघातानं सरकार बनवलं. जेव्हा एखाद्याचं लुबाडून घ्यायचं. हिसकावून घ्यायचं तेव्हा बारामतीकरांना आनंद असतो. जनतेने निवडून दिलेल्या सरकारप्रमाणे शपथविधीनंतर पहिल्या अधिवेशनात त्यावेळी सुप्रिया सुळे वरमाई असल्यासारख्या फिरत होत्या. राज्यात गणपती बसले आहेत. आता अनेकठिकाणी विसर्जन सुरू आहे. गणपती दरवर्षी येत असतात. परंतु २०२४ ला पवारांचं विसर्जन करण्यासाठी राज्याचे प्रदेशाध्यक्ष चंद्रशेखर बावनकुळे आवर्जुन संघटनेच्या कामाची सुरुवात करायला बारामतीत आलेत असं पडळकरांनी म्हटलं. 

हा पवारांचा बालेकिल्ला नाही तर टेकडी
बारामती लोकसभेत परिवर्तन करण्याची वेळ आली आहे आणि हे परिवर्तन निश्चित होणार आहे. हे फार अवघड काम नाही. हा किल्ला, बालेकिल्ला म्हटलं जातं पण ही पवारांची टेकडी आहे. केवळ वातावरण निर्मिती केली जात आहे. राष्ट्रवादीचं राजकारण पोलिसांवर चालतं. तहसिलदार, प्रांत, तलाठी यांच्यावर राजकारण चालतं. त्यापलीकडे राजकारण जात नाही असा आरोप गोपीचंद पडळकरांनी केला. 

...तर दुसरा पर्याय नाही
पंतप्रधान नरेंद्र मोदी यांच्या नेतृत्वात भारत जगाच्या पाठिवर ताठ मानाने उभा आहे. नरेंद्र मोदींना देशभरातील अनेक मतदारांनी २ वेळा देशाची सेवा करण्याची संधी दिली. त्यात बारामती मतदारसंघ नव्हता त्याची खंत येथील मतदारांना वाटत आहे. त्या भावना लोकं आम्हाला बोलून दाखवतात. हीच खंत वाटून घ्यायची नसेल तर २०२४ ला कमळ चिन्हावरील बटण दाबून लोकसभेला भाजपाचा खासदार पाठवावा लागेल. त्याशिवाय दुसरा पर्याय नाही असं आवाहन गोपीचंद पडळकरांनी कार्यकर्त्यांना केले. 

राष्ट्रवादीचं खरे दुखणं हेच 
सत्तेत असताना विरोधात बोलणाऱ्यांवर मोक्के लावले गेले. चळवळीत असणाऱ्या लोकांवर गुन्हे दाखल होतात. माझ्यावर किती गुन्हे नोंद केलेत. महिलांच्या शरीरावर जेवढे दागिने असतात तेवढे राजकीय नेत्यांवर गुन्हे हे आपले दागिने असतात. त्याशिवाय राजकारणात पुढे जाऊ शकत नाही. भाजपाचा कार्यकर्ता हा प्रस्थापित व्यवस्थेविरोधात ताठमानेने लढतो आणि जिंकतोही. एकनाथ शिंदेंसारख्या मराठा समाजातील व्यक्तीने इतके बंड केले आणि त्यांच्यामागे भाजपानं १०५ आमदारांची ताकद देत मुख्यमंत्रिपदी बसवलं हे राष्ट्रवादीचं खरे दुखणं आहे असा टोला गोपीचंद पडळकरांनी लगावला.