गोव्यात लोकशाहीचा खून - उद्धव ठाकरे

सामानातील लेखात शिवसेनेकडून पुन्हा एकदा भाजापाला टार्गेट केले आहे. यावेळी त्यांनी गोवा आणि केंद्रातील सरकारवर टीका केली

ऑनलाइन लोकमत
मुंबई, दि. 15 - मुंबई महानगरपालिका निवडणूका जाहिर झाल्यानंतर शिवसेने भाजपाशी युती तोडत एकला चलो रे चा नारा लगवला होता. मुंबईमध्ये जागावाटपावरुन दोन्ही मित्रपक्षामध्ये दुरावा निर्माण झाला होता. भाजपाला 40 जागाही निवडणून येणार नाहीत अशा तोऱ्यात शिवसेना होती. महापालिका निवडणूकीत मुख्यमंत्री फडणवीस यांच्या मार्गदर्शनाखाली भाजपाने न भूतो न भविष्यती यश मिळवत शिवसनेच्या अडचणी वाढवल्या. भाजपामुळे शिवसेनेला स्पष्ट बहुमत मिळवता आले नाही. याचं वेळी फडणवीस यांनी सरकार वाचवण्यासाठी बिनविरोध पाठिंबा देण्याचा निर्णय घेतं वाद शमवण्याचा प्रयत्न केला. पण भाजपाने शिवसेनेला डिवचल्यामुळे शांत राहिल ती कसली शिवसेना.

सध्या सुरु असलेलं अधिवेशनासह, कारभारावर सतत प्रश्नचिन्ह उपस्थित करणाऱ्या शिवसेनेने वारंवार भाजपावर टीकास्त्र सोडले. भाजपाला धडा शिकविण्याच्या हव्यासातून शिवसेनेना गोव्यातील राजकीय मैदानात उतरला व त्याने लज्जास्पद कामगिरी बजावली. गोव्यामध्ये शिवसेनेचे तीन उमेदवार उभे होते. या तीघांना मिळून गोव्यात फक्त 750 मते मिळाली आहेत. वास्तविक शिवसेनेने ही निवडणूक का लढविली, हाच मुळी एक गहन प्रश्न आहे. शिवसनेचे गोव्यात अस्तित्वच नाही. गोव्याचे मुख्यमंत्री म्हणून मनोहर पर्रीकर यांनी मंगळवारी चौथ्यांदा शपथ घेतली. गोव्यातील शिवसेनेच्या अवस्थेमुळे सोशल मीडियावर ते चर्चेचा विषय ठरले आहेत. आजच्या सामानातील लेखात शिवसेनेकडून पुन्हा एकदा भाजापाला टार्गेट केले आहे. यावेळी त्यांनी गोवा आणि केंद्रातील सरकारवर घनाघाती टीका केली. शिवसेनेची अवस्था मुंबई टू गोवा या चित्रपटातील विनोदासारखीच झाली म्हटल्यास हरकत नाही.

(गोव्यात शिवसेनेला मिळाली अवघी 750 मत, डिपॉझिटही जप्त)

शिवसेना मुखपत्र सामनातून गोव्यातील सत्ता कराणावर तोफ डागली आहे. सत्तेसाठी गोव्यात जी राजकीय धुळवड खेळली गेली तिला लोकशाहीचा खून याशिवाय वेगळे काही म्हणता येणार नाही. अर्थात, लोकशाहीचा असा खून गोव्यात अनेकदा झाला आहे. त्यात आणखी एका खुनाची भर पडली. खून पचवायची शक्ती आमच्या लोकशाहीला मिळो. अशी टीका सामनामधून भाजपावर करण्यात आली आहे. काँग्रेसच्या तुलनेत कमी जागा मिळवूनही गोव्यातील सत्तास्पर्धेत भाजपाने तूर्त तरी आघाडी घेतली आहे. अर्थात त्यासाठी गोव्याचे माजी मुख्यमंत्री मनोहर पर्रीकर यांना केंद्रातील संरक्षणमंत्रीपद सोडून पुन्हा गोव्याचे नवनिर्वाचित मुख्यमंत्री होण्याची वेळ आली आहे. ज्या पाच राज्यात निवडणुका झाल्या त्यात गोवा हे सर्वात छोटे राज्य, पण तेथे झालेली राजकीय उलथापालथ मोठीच म्हणावी लागेल.

सामनातील महत्वाचे मुद्दे

- गोव्यातील निकाल पूर्णपणे भाजपाच्या विरोधात गेले आहेत. गोव्याचा भौगोलिक आकार उत्तर प्रदेशच्या एखाद्या जिल्हय़ापेक्षाही लहान असावा.
- सत्ताधारी भाजपला जनतेने नाकारले व काँग्रेसला 17 जागा देऊन मोठा पक्ष म्हणून निवडून आणले. हा पराभव नक्की कोणाचा?
- मुख्यमंत्री पार्सेकरांसह अर्धा डझन विद्यमान मंत्र्यांचा पराभव झाला
- मनोहर पर्रीकर हे संरक्षणमंत्री म्हणून मोदी सरकारला ओझे झाले असावेत किंवा स्वतः मनोहर पर्रीकरांना दिल्लीपेक्षा गोवाच बरे असे वाटल्याने ते स्वतःच परतले आहेत
- संरक्षणमंत्री असताना पर्रीकर यांचा मुक्काम सदासर्वकाळ गोव्यातच होता व गोव्यातून ते पाकिस्तानसारख्या देशाच्या दुश्मनास सुका दम भरीत होते.
- सर्वात मोठा पक्ष ठरल्यानंतर बहुमताची जुळवाजुळव करण्यासाठी ज्या वेगवान हालचाली कराव्या लागतात त्यात काँग्रेस मागे पडली
- काँग्रेस सुस्त राहिली म्हणून भाजपविरोधात निवडून आलेले पक्ष भाजपच्याच घोडेबाजारात सामील झाले आणि बुधवारी मुख्यमंत्री पर्रीकर यांचा शपथविधीही पार पडला.
- गोव्याच्या बाबतीत भाजपने काँग्रेस परंपरेचीच ह्यरीह्ण ओढली.