पीएमपीचे रुतलेले चाक काढण्याचे आव्हान

बेशिस्त कारभारामुळे कायमच टीकेचे धनी बनलेल्या पुणे महानगर परिवहन महामंडळाचा (पीएमपी) मोडकळीस आलेला गाडा पुन्हा

पुणे : बेशिस्त कारभारामुळे कायमच टीकेचे धनी बनलेल्या पुणे महानगर परिवहन महामंडळाचा (पीएमपी) मोडकळीस आलेला गाडा पुन्हा सुस्थितीत आणून पीएमपीला स्मार्ट करण्याचे मोठे आव्हान नवनियुक्त अध्यक्ष व व्यवस्थापकीय संचालक तुकाराम मुंढे यांच्यासमोर असणार आहे. सक्षम आणि धडाडीचे अधिकारी म्हणून त्यांच्याकडे पाहिले जात असल्याने पीएमपीचा चेहरामोहरा बदलण्याचे शिवधनुष्य मुंढे यांना पेलावे लागेल. मुंढे
यांच्या नियुक्तीपणे ‘पीएमपी’ला नवी दिशा मिळण्याची आशा पल्लवित झाली आहे.
मागील नऊ महिन्यांपासून ‘पीएमपी’ला पुर्णवेळ अधिकारी मिळालेला नव्हता. त्यामुळे पीएमपीच्या कामकाजात काही प्रमाणात विस्कळीतपणा आला आहे. पालिका आयुक्त कुणाल कुमार यांनी हा भार व्यवस्थितपणे सांभाळला असला तरीही त्यांना काही मर्यादा होत्या. त्यामुळे खिळखिळी झालेली पीएमपी अडचणींच्या गर्तेतून बाहेर पडली नाही. डॉ.श्रीकर परदेशी यांच्याकडे डिसेंबर २०१४ मध्ये पीएमपीचा अतिरिक्त भार आल्यानंतर त्यांनी चार महिन्यांतच बंद असलेल्या बसगाड्या दुरुस्त करुन रस्त्यावर आणल्याने बसगाड्यांची संख्या वाढून प्रवासी संख्याही वाढली होती. मात्र परदेशी यांची बदली झाल्यानंतर पुन्हा ‘जैसे थे’ स्थिती झाली. त्यानंतर अभिषेक कृष्णा यांनीही काही महत्वपुर्ण निर्णय घेत पीएमपी सुधारणेचा प्रयत्न केला. मात्र, तेही कार्यकाळ पुर्ण न करू शकल्याने पीएमपीसमोरील आव्हाने कायम राहिली.(प्रतिनिधी)

राजकीय हस्तक्षेपाला बसणार अटकाव
१अपुरी बससंख्या ही पीएमपीपुढची मोठी अडचण आहे. सध्या किमान साडे तीन हजार बस ताफ्यात असणे अपेक्षित आहे. तसेच सध्या ताफ्यात असलेल्या बसेसची अवस्थाही फारशी चांगली आहे. देखभाल-दुरूस्तीच्या अभावामुळे ब्रेकडाऊनचे वाढलेले प्रमाण, त्यामुळे संचलनात आलेला विस्कळीतपणा, परिणामी प्रवाशांची नाराजी, त्यांची घटती संख्या, वाढता तोटा या गोष्टी पीएमपीसाठी डोकेदुखी ठरत आहेत. संचलनातील विस्कळीतपणामुळे पीएमपी तोट्यात चालली आहे.
२एकुण ३७४ पैकी केवळ १० मार्ग फायद्यात आहेत. सध्या बसगाड्या उभ्या करण्यासाठी जागा नसल्याने त्या रात्रीच्या वेळी रस्त्यांवरच उभ्या करुन ठेवाव्या लागतात. बससेवा क्षेत्राच्या तुलनेत आगारांची संख्या कमी आहे. त्यासाठी शेकडो एकर जमीन लागणार आहे. प्रशासनातील काही अधिकारी व कर्मचाऱ्यांवर सातत्याने भ्रष्टाचार व कामचुकारपणाचे आरोप होतात. काही बेकायदेशीर नियुक्त्या, कामांना अधिकारी पाठबळ देत आहेत. त्यातच मोठ्या प्रमाणात राजकीय हस्तक्षेप होत असल्याच्या अनेक तक्रारी विविध घटकांकडून केल्या जातात. या सर्वांना तोंड देत त्यात आश्वासक बदल करण्यासाठी मुंढे यांना काही कठोर निर्णय घ्यावे लागणार आहे. 
पीएमपी सक्षम होणे आवश्यक 
मुंढे यांच्या नियुक्तीमुळे कामगार व प्रवाशांमध्ये आनंदाचे वातावरण आहे. पीएमपीमध्ये मोठ्या सुधारणा होतील. पुणेकरांच्या दृष्टीने पीएमपी सक्षम होणे आवश्यक आहे. त्यासाठी मुंढे यांच्यासारखा अधिकारी मिळण्याची गरज होती.
- राजेंद्र खराडे, 
अध्यक्ष, पीएमपी इंटक

भ्रष्ट कारभाराला आळा बसेल
डॉ. श्रीकर परदेशी यांच्यानंतर मुंढे यांच्या रूपाने सक्षम अधिकारी पीएमपीला मिळाला आहे. त्यामुळे कामगारांमध्ये आनंदाचे वातावरण आहे. भ्रष्ट कारभाराला आळा बसून कामकाजात सुधारणा होईल, असा विश्वास आहे.
- सुनील नलावडे, 
सरचिटणीस, राष्ट्रवादी कामगार युनियन

मागील दहा वर्षात पीएमपीला दहा अधिकारी मिळाले आहेत. आतापर्यंतच्या अधिकाऱ्यांमध्ये डॉ. श्रीकर परदेशी धडाडीचे होते. मुंढे यांच्याकडेही त्याचप्रमाणे पाहिले जात आहे. सध्या पीएमपीची अवस्था खूपच वाईट आहे. त्यामुळे मुंढे तीन वर्षे याच पदावर राहायला हवेत. असे झाल्यास पीएमपीची गाडी निश्चितपणे रूळावर येईल.
- विवेक वेलणकर, निमंत्रक, पीएमपी प्रवासी मंच

तुकाराम मुंढे यांच्यापुढे आव्हानांची षष्ठी
अपुरी बससंख्या
बे्रकडाऊनचे वाढते प्रमाण
प्रवाशांची घटती संख्या
कोट्यवधी रुपयांचा तोटा
बस पार्किंगसाठी जागेचा अभाव
पीएमपी कारभार स्मार्ट करणे

पीएमपीची सद्य:स्थिती
 एकूण सेवा क्षेत्र ६०० चौ किमी
 दैनंदिन प्रवासी सुमारे ११ लाख
 एकूण आगार १३
 एकूण बसेस २०५५
 एकूण कर्मचारी सुमारे ९७००
 दैनंदिन संचलनातील
बस सुमारे १५००
 दैनंदिन संचलन ३ लाख किमी पेक्षा जास्त
 दैनंदिन उत्पन्न १.५० कोटी
 दैनिक पास खप ३५०००
 ब्रेकडाऊनचे प्रमाण सुमारे २७५
 दैनंदिन तोटा
 पुणे मनपा, पिंपरी चिंचवड मनपा, तीन कॅन्टोन्मेंट बोर्ड, सासवड, तळेगाव, आळंदी, राजगुरुनगर नगरपालिका व २० किमी पर्यंतची गावांपर्यंत बस