पायाभूत सुविधा पूर्ण करण्याचे आव्हान

पनवेल महानगरपालिका होण्यासंदर्भात सोमवारी अधिसूचना जारी होण्याची शक्यता आहे

प्रशांत शेडगे,
पनवेल- पनवेल महानगरपालिका होण्यासंदर्भात सोमवारी अधिसूचना जारी होण्याची शक्यता आहे. महापालिका झाल्यानंतर प्रशासनाच्या दृष्टीने होणाऱ्या बदलांपेक्षा सामान्य नागरिकांना कोणत्या बदलांना सामोरे जावे लागेल, याचा विचार होणे गरजेचे आहे. प्रस्तावित महापालिकेपुढे शहरातील मूलभूत सुविधांबरोबरच पायाभूत सुविधा पुरवण्याचे आव्हान आहे. यात पाणी, उड्डाणपूल, घनकचरा, मलनि:सारण, रस्ते यासारख्या गोष्टींचा अंतर्भाव अपेक्षित आहे.
पनवेल नगरपालिका क्षेत्र, सिडको वसाहतीमध्ये घनकचरा व्यवस्थापनाची सुविधा आहे. प्रक्रि या करण्याकरिता चाळ येथे क्षेपणभूमी आहे. याच केंद्रात पनवेल नगरपालिका क्षेत्रातील कचरा विल्हेवाट लावण्याकरिता पाठवला जातो. या प्रक्रि या केंद्राची क्षमता ३०० मेट्रिक टन इतकी आहे. या भागात दरडोई ४०० ग्रॅम इतका कचरा निर्माण होतो. प्रस्तावित पनवेल महानगरपालिका क्षेत्रात २४० मेट्रिक टन कचरा निर्माण होण्याची शक्यता आहे. त्यामुळे चाळ येथील घनकचरा व्यवस्थापन केंद्राची क्षमता ५०० मेट्रिक टन करण्याचा प्रस्ताव आहे.
प्रस्तावित महानगरपालिका क्षेत्रात सध्याची लोकसंख्या विचारात घेता, पाण्याची मागणी २२० एमएलडी असून पुरवठा १९२ एमएलडी इतका आहे. म्हणजे सध्या तूट १४ एमएलडी इतकी आहे. भविष्यात पाणीपुरवठ्याची एकूण मागणी ३३० एमएलडी आहे. त्याकरिता नियोजन केल्यात ८०० एमएलडी इतका पाणीसाठा उपलब्ध होऊ शकणार आहे.
>समाविष्ट गावे
तळोजा पाचनंद, खारघर, काळुंद्रे, ओवे, देवीचा पाडा, कामोठे, चाळ, नावडे, नावडे खार, तोंडरे, पेंधर, कळंबोली, कोल्हेखार, आंबेतखार, रोडपाली, खेडुकपाडा, पडघे, वळवली, पालेखुर्द, टेंभोडे, आसूडगाव, खैरणे बुद्रुक, आदई, आकुर्ली, पाली देवद, विचुंबे, उसर्ली खुर्द, रायचूर, चिपळे, बोनशेत, विघर, चिखले, कोन, डेरवली, पळस्पे, कोळखे, शिवकर, कोप्रोली, केवाळे, नेरे, हरीग्राम, नितळस, खैरणे खुर्द, कोनपोली, वलप, हेदुटणे, पाले बुद्रुक, वाकडी, नेवाळी, उमरोली, आंबिवली, मोह, नांदगाव, कुडावे, वडवली, तुरमाळे, चिरवद, बीड, अडीवली, रोहिंजण, धानसर, पिसार्वे, तुर्भे, करवले, नागझरी, तळोजे मजकूर, घोट, घोट कॅम्प
>मलनिस्सारण
प्रस्तावित महानगरपालिका क्षेत्रातील पनवेल नगरपालिका, सिडको वसाहतीत सध्याची सांडपाणी प्रक्रि येबाबतची क्षमता १७४ एमएलडी आहे. प्रस्तावित क्षमता १८० एमएलडी इतकी आहे. नियोजन केल्यानंतर एकूण क्षमता ३५४ एमएलडी वाढवता येईल.
प्रशासकीय व्यवस्था
पनवेल महानगरपालिकेचा वर्ग ड असल्याने शासन निर्णयानुसार, महानगरपालिकेच्या सेवांची प्रशासकीय सेवा, लेखा सेवा, तांत्रिक सेवा अशी करण्यात येईल. अधिकारी, पदनाम, पदसंख्या व वेतनश्रेणी याबाबतचा आकृतीबंध निश्चित करण्याकरिता शासनाची मान्यता घेणे आवश्यक राहणार आहे.