Maharashtra Politics: "राजकारणासाठी महाराष्ट्राला बदनाम करू नका, दंगली घडू नये यासाठी पुढाकार घ्या"

Chandrashekhar Bawankule Sharad Pawar, Maharashtra Politics: भाजपा प्रदेशाध्यक्ष चंद्रशेखर बावनकुळे यांचा शरद पवारांकडे रोख

Chandrashekhar Bawankule Sharad Pawar, Maharashtra Politics: निवडणुकीच्या तोंडावर दंगली घडणार असे विधान करण्यापेक्षा शरद पवारांनी समाजात तेढ निर्माण करणाऱ्या लोकांना थांबवण्यासाठी पुढाकार घ्यावा. राजकारणासाठीमहाराष्ट्राला बदनाम करू नका, अशा शब्दांत भाजपचे प्रदेशाध्यक्ष आमदार चंद्रशेखर बावनकुळे यांनी शरद पवारांना इशारा दिला. "शरद पवारांनी दंगली घडणार अशी भाषा का केली, त्यांच्या मनात काय आहे, हे माहिती नाही. परंतु उपमुख्यमंत्री तसेच गृहमंत्री देवेंद्र फडणवीस यांच्या सक्षम नेतृत्त्वात महाराष्ट्रात अशी स्थिती कधीही येणार नाही", असा विश्वासही त्यांनी व्यक्त केला.

"डॉ. आंबेडकरांच्या आरक्षणाच्या भूमिकेला काँग्रेसने कधीच मदत केली नाही. काँग्रेसने कधीही सामाजिक आरक्षण योग्य पद्धतीने हाताळले नाही. त्यांनी समाजा-समाजात वाद निर्माण केले. डॉ. बाबासाहेब आंबेडकरांना लोकसभेत हरविण्याचे कामही काँग्रेसनेच केले. प्रकाश आंबेडकरांनी उपमुख्यमंत्री देवेंद्र फडणवीसांवर राजकीय टीका केली आहे. फडणवीस यांना खलनायक ठरविण्याचे काम केले जात आहे. फडणवीस यांची मराठा समाजाच्या विषयात भूमिका प्रामाणिक आहे. पण त्यांची उंची कमी करण्याचा प्रयत्न काही लोक करत आहेत," अशी टीका बावनकुळे यांनी केली.

"अनिल देशमुख हे गृहमंत्री होते. दबाव आणण्यावर तेव्हाच का कारवाई केली नाही. ते आता अडीच वर्षानंतर संभ्रम निर्माण का करत आहेत? एवढे राजकारण करण्यापेक्षा महाराष्ट्राचा विकासाचा विचार करण्यावर विचार व्हायला हवा. महायुतीचे तिन्ही नेते एकत्र बसून लोककल्याणकारी निर्णय घेत आहेत. महायुतीचे सरकार महाराष्ट्रातील पुन्हा येईल आणि हे सरकार गरीब कल्याण योजना राबवत राहिल. तसेच सध्या ज्या भागात नुकसान झाले आहे, त्याचे सर्वेक्षण करण्याचे आदेश राज्य सरकारने दिले आहेत. मदत करण्यासाठी जनप्रतिनिधी म्हणून आम्ही जे काही करता येईल, ते काम करत आहोत," असेही त्यांनी स्पष्ट केले.