दादरच्या बालेकिल्ल्यात प्रतिष्ठेचा 'सामना'

मुंबई महापालिका निवडणुकीत काही मतदारसंघांमधील लढती राजकीय पक्षांसाठी अत्यंत प्रतिष्ठेच्या असणार आहेत. इथे विजय मिळवण्यासाठी राजकीय पक्ष आपली शक्ती पणाला लावत आहेत.

 ऑनलाइन लोकमत 

मुंबई, दि. 7 - मुंबई महापालिका निवडणुकीत काही मतदारसंघांमधील लढती राजकीय पक्षांसाठी अत्यंत प्रतिष्ठेच्या असणार आहेत. इथे विजय मिळवण्यासाठी राजकीय पक्ष आपली शक्ती पणाला लावत आहेत. अशा मतदारसंघांपैकी एक आहे दादरचा वॉर्ड नंबर 191. शिवसेनेचे मुख्यालय शिवसेना भवन तर, मनसे अध्यक्ष राज ठाकरे यांचे निवासस्थान या मतदारसंघात आहे. त्यामुळे दोन्ही पक्षांसाठी या मतदारसंघात जय-पराजय प्रतिष्ठेचा असणार आहे. 

 

2008 पर्यंत हा विधानसभा मतदारसंघ शिवसेनेचा बालेकिल्ला होता. पण 2009 विधानसभा निवडणुकीत मनसेचे नितीन सरदेसाई इथून आमदार झाले आणि त्यानंतर चित्रच बदलून गेले. 2012 मध्ये मनसेने येथे क्लीनस्वीप करताना नगरसेवकपदाच्या सर्वच्या सर्व सात मतदारसंघांमध्ये विजय मिळवला. पण 2014 मध्ये पुन्हा इथून शिवसेनेचे सदा सरवणकर आमदार म्हणून विजयी झाले. त्यामुळे यावेळी या विभागात दोन्ही पक्षांमध्ये 'काटें की टक्कर' आहे. त्यात 191 वॉर्ड दोन्ही पक्षांसाठी प्रतिष्ठेचा आहे. 

 

शिवसेनेने इथे बाजी मारण्यासाठी माजी महापौर विशाखा राऊत यांना रिंगणात उतरवले आहे. मनसेकडून स्वप्ना देशपांडे रिंगणात आहेत. त्या विद्यमान नगरसेवक संदीप देशपांडे यांच्या पत्नी आहेत. हा मतदारसंघ महिलांसाठी राखीव झाला आहे. निवडणूक लढवण्यासाठी स्वप्ना देशपांडे यांनी सरकारी नोकरीचा राजीनामा दिला आहे. भाजपाकडून डॉ. तेजस्वीनी जाधव रिंगणात आहेत. 

मराठीबहुल या भागामध्ये शिवाजीपार्क, शिवसेना भवनचा परिसर येतो. 1966 साली शिवसेनेची स्थापना झाल्यापासून इथे शिवसेनेचे वर्चस्व होते. पण 2009 पासून शिवसेनेच्या या गडाला खिंडार पडले. शिवसेना नेते आणि माजी मुख्यमंत्री मनोहर जोशी यांचा हा मतदारसंघ आहे.