"…और भक्त कहते हैं भारत इनके हाथ में सुरक्षित है ", सचिन सावंतांचा भाजपावर निशाणा

Sachin Sawant : जे स्वतःचे ट्विटर अकाऊंट वाचवू शकले नाही ते देशाच्या सीमा कशा सुरक्षित ठेवणार असा खोचक सवाल काँग्रेस नेते सचिन सावंत यांनी भाजपाला केला आहे.

मुंबई : पंतप्रधान नरेंद्र मोदींचं (PM Narendra Modi) ट्विटर अकाऊंट (Twitter Account Hacked ) हे काही वेळासाठी हॅक केल्याचे समोर आले. पंतप्रधान कार्यालयाने याबाबत माहिती दिली होती. मात्र, ट्विटर अकाऊंट काही वेळात पुन्हा सुरळीत करण्यात आले. 

दरम्यान, अकाऊंट हॅक केल्यानंतर काही वेळातच हॅकर्सनी क्रिप्टोकरन्सीला प्रोत्साहन देणारे एक ट्विट केले होते. नंतर हे ट्विट डिलीट करण्यात आले. मात्र, या ट्विटचे स्क्रिनशॉट सोशल मीडियावर तुफान व्हायरल होत आहेत. यावरून काँग्रेस नेते सचिन सावंत यांनी भाजपावर निशाणा साधला आहे.  

जे स्वतःचे ट्विटर अकाऊंट वाचवू शकले नाही ते देशाच्या सीमा कशा सुरक्षित ठेवणार असा खोचक सवाल काँग्रेस नेते सचिन सावंत यांनी भाजपाला केला आहे. "चौकीदार अपना ट्विटर अकाउंट नहीं बचा सकता, वह देश की सीमा कैसे बचा सकता हैं? और भक्त कहते हैं भारत इनके हाथ में सुरक्षित है।", असे काँग्रेस नेते सचिन सावंत ट्विटद्वारे म्हणाले आहेत.

चौकीदार अपना ट्विटर अकाउंट नहीं बचा सकता वह देश की सीमा कैसे बचा सकता हैं?
और भक्त कहते हैं भारत इनके हाथ में सुरक्षित है।

— Sachin Sawant सचिन सावंत (@sachin_inc) December 12, 2021

पंतप्रधान कार्यालयाने ट्विट करत यासंबंधी माहिती दिली होती. 'पंतप्रधानांचं ट्विटर हँडल @narendramodi सोबत छे़डछाड करण्यात आली होती. ट्विटरला याची माहिती देण्यात आली असून अकाऊंट तात्काळ पुन्हा सुरक्षित करण्यात आले आहे. छेडछाड करण्यात आलेल्या काळात करण्यात आलेल्या ट्वीटकडे दुर्लक्ष करा,' असे पंतप्रधान कार्यालयाने म्हटले होते. 

दरम्यान, "भारताने अधिकृतपणे बिटकॉईनला कायदेशीर मान्यता दिली आहे आणि सरकार 500 बीटीसी विकत घेत आहे आणि लोकांमध्ये वितरित करत आहे" असे ट्विट हे अकाऊंट हॅक केल्यानंतर करण्यात आले होते. 

रविवारी साधारण 2 वाजून 11 मिनिटांनी हे ट्विट करण्यात आले होते. आता अकाऊंटवरून हे ट्विट हटवण्यात आले आहे. मात्र, काही युजर्स सुरक्षा व्यवस्थेवरही प्रश्नचिन्ह उपस्थित करत आहेत. हे ट्विट हटवले गेले असले तरी काही युजर्सनी त्याचे स्क्रीनशॉट शेअर केले आहेत.