Dahanu Vidhan Sabha Election Result 2024 Live : भगव्या वादळात फडकले लाल निशाण, डहाणूत माकपचे विनोद निकोले विजयी

Dahanu Vidhan Sabha Election Result 2024 Live : डहाणू विधानसभा मतदारसंघामध्ये माकपचे उमेदवार विनोद निकोले यांनी भाजपच्या विनोद मेढा यांचा पराभव करत दुसऱ्यांदा विजय मिळवला आहे.

Dahanu Assembly-Vidhan Sabha Election 2024 Result Live : पालघर : महाराष्ट्रात विधानसभा निवडणुकीच्या निकालात महायुतीने स्पष्ट बहुमत मिळवले आहे. राज्यातील अनेक मतदारसंघात महाविकास आघाडीचा सुपडासाफ झाला आहे. पालघर जिल्ह्यात सुद्धा महाविकास आघाडीला धक्का बसला आहे. मात्र, पालघर जिल्ह्यातील महाविकास आघाडीचा घटक पक्ष असलेल्या माकपचे डहाणू विधानसभा मतदारसंघातील उमेदवार विनोद निकोले यांनी बाजी मारली आहे.

डहाणू विधानसभा मतदारसंघामध्ये माकपचे उमेदवार विनोद निकोले यांनी भाजपच्या विनोद मेढा यांचा पराभव करत दुसऱ्यांदा विजय मिळवला आहे. यावेळी विधानसभेला डहाणू मतदारसंघातून विनोद निकोले आणि भाजपचे उमेदवार विनोद मेढा  यांच्यात प्रमुख लढत होती. या प्रतिष्ठेच्या लढाईत विनोद निकोले हे ५१३३ मतांनी विजयी झाले आहेत. विनोद निकोले यांना १०४७०२ मतं मिळाली आहेत. तर विनोद मेढा यांना ९९५६९ मतं मिळाली.

या मतदारसंघात मतमोजणी दरम्यान सुरुवातीच्या काळात भाजपचे विनोद मेढा हे आघाडीवर होते. त्यानंतर मध्यावधी मतमोजणीनंतर विनोद निकोले यांनी सरशी घेत अखेरपर्यंत मताधिक्य राखले. दरम्यान, या मतदारसंघात २०१९ मध्येही विनोद निकोल विजयी झाले होते. तर यापूर्वी २०१४ मध्ये डहाणूमध्ये भाजपने पहिल्यांदाच विजय मिळवला होता आणि पास्कल धनारे आमदार म्हणून निवडून आले होते.