...तर उद्धव ठाकरेंसह आम्ही सर्वच चोर ठरतो का? देवेंद्र फडणवीसांचा संजय राऊतांवर हल्लाबोल

'अशा प्रकारच्या व्यक्तीवर काय कारवाई केली पाहिजे, जनता हे सगळं पाहता आहे.'

मुंबई : राज्याच्या अर्थसंकल्पीय अधिवेशनाचा आज दुसरा दिवस असून, आज संजय राऊतांविरोधात सर्व सत्ताधारी आमदार एकवटले आहेत. खासदार संजय राऊत यांनी विधीमंडळाचा उल्लेख चोरमंडळ, असा केल्याने सत्ताधाऱ्यांनी विधीमंडळात हा मुद्दा उपस्थित करत हक्कभंगाची मागणी केली आहे. यावरुन राज्याचे उपमुख्यमंत्री देवेंद्र फडणवीस यांनी राऊतांवर जोरदार हल्लाबोल केला.

संजय राऊतांच्या विधानाचे विधान परिषदेतही जोरदार पडसाद उमटले आहेत. राऊत यांच्या या विधानाचा उपमुख्यमंत्री देवेंद्र फडणवीस यांनी निषेध नोंदवला. संजय राऊत आम्हाला चोर मंडळ म्हणत आहेत. उद्धव ठाकरेदेखील याच सभागृहाचे सदस्य आहेत, मग आम्ही सर्वच चोर ठरतो का? असा सवाल देवेंद्र फडणवीस यांनी राऊत यांना विचारला आहे.

ते पुढे म्हणाले, महाराष्ट्रातील विधानमंडळ देशातील सर्वोत्तम विधान मंडळ म्हटले जाते. पण विधान मंडळाला चोर म्हणण्याचा अधिकार दिला तर मग या विधानमंडळावर कुणाचा विश्वास राहणार नाही. न्यायालयाच्या विरोधात बोलल्यावर कंटेम्प्ट ऑफ कोर्ट होतं. तसेच विधान मंडळावर कोणी काही बोलू नये म्हणून हक्कभंगाची व्यवस्था केली आहे. आपल्याला हक्कभंग आयुध दिलं कशासाठी? असे देवेंद्र फडणवीस म्हणाले.

फडणवीस पुढे म्हणतात, संजय राऊत साधे नेते नाहीत, राज्यसभेचे सदस्य आहेत. मोठ्या सभागृहाचे नेते असं करत असतील तर कसं सहन करणार? हक्कभंग घ्यायचा असेल तर घ्या नाही तर नका घेऊ. पण आम्ही याचानिषेध नोंदवला नाही तर उद्या हजारो संजय राऊत विधान मंडळाला चोर म्हणतील. सरकार म्हणून मी लोकांच्या भावना समजून घेतो. व्यक्ती कोणीही असो आमच्या पक्षातील असला तरी विधानमंडळाचा अपमान खपवून घेणार नाही. अशा प्रकारच्या व्यक्तीवर काय कारवाई केली पाहिजे हे जनता पाहता आहे, असंही फडणवीस म्हणाले.