नवरदेवाला घेऊन घोड्याने ठोकली धूम

लग्नाच्या वरातीतून नवरदेवाला घेऊन घोड्याने धूम ठोकली. मात्र, घटनास्थळापासून काही अंतरावर नवरदेव घोड्यावरून खाली पडून जखमी झाला.

श्रीगोंदा (जि. अहमदनगर) : लग्नाच्या वरातीतून नवरदेवाला घेऊन घोड्याने धूम ठोकली. मात्र, घटनास्थळापासून काही अंतरावर नवरदेव घोड्यावरून खाली पडून जखमी झाला. बोहल्यावर चढण्यापूर्वीच दवाखान्यात उपचार करण्याची वेळ त्याच्यावर आली. रविवारी सकाळी ११च्या सुमारास श्रीगोंदा तालुक्यातील घारगाव येथे ही घटना घडली.
चांडगाव येथील रामदास म्हस्के यांचे चिरंजीव सचिन व रुई छत्तीशी येथील प्रमोद भवर यांची कन्या सुप्रिया यांचा विवाह रविवारी होता. नवरदेवाची सकाळी ११च्या सुमारास घोड्यावरून मिरवणूक काढण्यात आली.
नवरदेवाचे मित्र डिजेच्या तालावर बेभान होऊन नाचत होते आणि नवरदेवाचा घोडाही नृत्य करीत होता. डिजेच्या आवाजाने घोडा अचानक बिथरला आणि त्याच वेळी नाचविणाऱ्याच्या हातून लगाम सुटल्याने घोड्याने नवरदेवासह धूम ठोकली.
साधारण १ कि.मी. अंतरापर्यंत ग्रामस्थ व नातेवाईक घोड्याच्या मागे धावले. त्या वेळी नवरदेव घोड्यावरून पडून जखमी झाल्याचे दिसले. नातेवाईकांनी त्याला दवाखान्यात नेऊन उपचार केले. त्यानंतर, सुमारे तासाभर उशिरा सचिन व सुप्रिया विवाहबद्ध झाले. (तालुका प्रतिनिधी)