डोंबिवलीतही ड्रंक अँड ड्राईव्ह, फूटपाथवर झोपलेल्या मायलेकी ठार
By admin | Published: September 23, 2015 09:05 AM2015-09-23T09:05:17+5:302015-09-23T09:20:39+5:30
दारूच्या नशेत वेगाने गाडी चालवून इक्बाल शेखने बुधवारी पहाटे फूटपाथवर झोपलेल्या मायलेकींना चिरडल्याची घटना डोंबिवलीत घडली आहे.
डोंबिवलीतही ड्रंक अँड ड्राईव्ह, फूटपाथवर झोपलेल्या मायलेकी ठार
Next
डोंबिवली, दि. २३ - दारूच्या नशेत भरधाव वेगाने गाडी चालवून फूटपाथवर झोपलेल्यांना चिरडल्याप्रकरणी अभिनेता सलमान खानचा खटला चर्चेत असतानाच डोंबिवलीतही असा 'ड्रंक अँड ड्राईव्ह'चा प्रकार घडला असून त्यात निष्पाप माय-लेकींना जीव गमवावा लागला आहे. दारूच्या नशेत वेगात गाडी चालवणा-या इक्बाल शेख (वय २४) या तरूणाने बुधवारी पहाटे शिवमंदिर परिसरात फूटपाथवर झोपलेल्या मायलेकींना चिरडले. त्यात त्या दोघींचा मृत्यू झाला आहे.
शिवमंदिर परिसरातील गिरनार चौकात आज पहाटे ३.३० च्या सुमारास हा अपघात घडला. दारूच्या नशेत असलेल्या इक्बालच्या इनोव्हा गाडीची धडक समोरून येणा-या स्कोडाला बसली आणि इनोव्हा सरळ फूटपाथवर चढली. तेथे झोपलेली एक महिला ( वय सुारे ४०) आणि तिची मुलगी ( वय अंदाजे १०-११ वर्ष) गाडीखाली चिरडल्या गेल्याने त्यांचा अंत झाला. या अपघातात स्कोडाचा मालकही किरकोळ जखमी झाला असून त्याच्यावर रुग्णालयात उपचार करून त्याला सोडून देण्यात आले.
याप्रकरणी पोलिसांनी ठाकुर्लीचा रहिवासी असलेल्या इक्बालला अटक केली असून रामनगर पोलिस स्थानकात त्याच्यावर दारू पिऊन गाडी चालवणे, समोरच्या गाडीचे नुकसान करणे, तसेच हत्येचा प्रयत्न असे गुन्हे दाखल करण्यात आले आहेत.
