कल्याण, उल्हासनगर्पयत नवी मुंबई मेट्रोचा विस्तार

भागीदारी तत्त्वावर मेट्रो मार्ग विस्ताराची योजना असून त्यासंबंधीचा कार्यअहवाल तयार करण्याचे काम सुरू असल्याची माहिती सिडको अध्यक्ष प्रमोद हिंदूराव यांनी दिली.

नवी मुंबई : नवी मुंबई मेट्रोचा विस्तार कल्याण व उल्हासनगर्पयत करण्याची सिडकोची योजना आहे. एमएमआरडीए आणि राज्य शासनाच्या सहभागातून भागीदारी तत्त्वावर मेट्रो मार्ग विस्ताराची योजना असून त्यासंबंधीचा कार्यअहवाल तयार करण्याचे काम सुरू असल्याची माहिती सिडको अध्यक्ष प्रमोद हिंदूराव यांनी दिली.

सिडकोच्या माध्यमातून बेलापूर ते तळोजा (पेंधर) या अकरा कि.मी. लांबीच्या मेट्रो मार्गाचे काम तीन वर्षापासून सुरू आहे. या प्रकल्पासाठी तब्बल साडेचार हजार कोटी खर्च होणार आहे. प्रस्तावित नवी मुंबई आंतरराष्ट्रीय विमानतळाच्या दृष्टीने हा प्रकल्प अत्यंत उपयुक्त ठरणार आहे. असे असले तरी विमानतळाच्या पाश्र्वभूमीवर शहरातील दळणवळण यंत्रणा अत्यंत सक्षम करण्याचा निर्णय सिडकोने घेतला आहे. त्याचाच एक भाग म्हणून नवी मुंबई मेट्रोचा विस्तार कल्याण आणि उल्हासनगर्पयत करण्याची सिडकोची योजना आहे. त्यासाठी एमएमआरडीए आणि राज्य शासनाची मदत घेणार आहे. त्यादृष्टीने प्राथमिक कार्यवाही सुरू करण्यात आल्याचे हिंदूराव यांनी सांगितले. (प्रतिनिधी)