वसईमधल्या 'त्या' पुलाचं पाचव्यांदा उद्घाटन

वसई, दि. 25 - उद्घाटन होत नाही म्हणून वैतागून वसईकरांनीच उद्घाटन केलेल्या  पंचवटी उड्डाण पुलाचं पाचव्यांदा उद्घाटन करण्यात आलं आहे. वादात सापडलेल्या या पुलाचं आदिवासी विकास मंत्री विष्णू सावरा आणि वसईचे आमदार हितेंद्र ठाकूर यांच्या हस्ते उद्घाटन करण्यात आलं. आश्चर्याची गोष्ट म्हणजे लोकांनी पुलाचं उद्धाटन केल्यानंतर एमएमआरडीएने पुल पुन्हा बंद केला होता. पण त्यानंतर परत मनसे, जन आंदोलन समिती आणि राष्ट्रवादी काँग्रेसने या पुलाचं वेगवेगळ्या दिवशी उद्धाटन केलं होतं. मात्र अखेर पुलाला सरकारी मुहूर्त मिळाला आणि पाचव्यांदा विष्णू सावरा आणि हितेंद्र ठाकूर यांच्या हस्ते उद्घाटन करण्यात आलं. 

चार वेळा लुटूपुटूचे उद्घाटन केले गेल्याने वसईच्या पंचवटी उड्डाण पुलाची लिम्का बुक ऑफ रेकॉर्डमध्ये नोंद केली जाणार असल्याची उपहासात्मक चर्चा वसईत केली जात होती. ऐन गर्दीच्या वेळीच दररोज उद्घाटन होत असल्याने शेवटी एमएमआरडीएने पुलावर फलक लावून येत १५ दिवसात पूल वाहतूकीसाठी खुला करू अशी हमी दिली होती.

 

15 जून रोजी नागरिकांकडून उद्घाटन

16 जून रोजी मनसे

17 जून रोजी जनआंदोलन समिती

18 जून राष्ट्रवादी काँग्रेस

25 जून पालकमंत्री विष्णू सावरा यांच्या हस्ते उद्घाटन

 

चार वेळा उद्घाटन करून खुला झालेला वसईतील हा पूल देशातील एकमेव उदाहरण असेल. चारही वेळा वेगवेगळ्या व्यक्ती, पक्षाने उद्घाटन केल्यामुळे त्याचे वेगळेपणही ठळकपणाने जाणवणार आहे. त्यामुळे या आगळ्या-वेगळ्या विक्रमाची लिम्का बुक आॅफ रेकॉर्डकडून नक्कीच दखल घेतली जाईल अशी उपहासात्मक चर्चा केली जात आहे.