'अ‍ॅडॉल्फ हिटलर' वर मराठीत पहिली कल्पनाप्रधान कादंबरी

क्रूरपणा आणि ज्यूंच्या कत्तलीसाठी कुप्रसिद्ध असलेला नेता अशी अ‍ॅडॉल्फ हिटलर याची जगभरात ओळख.

ठळक मुद्देऐतिहासिक काल्पनिकतेवर '१९७० : एडॉल्फ हिटलरचे पुनरागमन' ही मराठी काल्पनिक कादंबरीइंग्रजीतील अनुवादित पुस्तकाचे 23 देशांमध्ये प्रकाशन       या कादंबरीवर चित्रपट निर्मित व्हावा अशी इच्छा

- नम्रता फडणीस- 

पुणे : जर्मनीचा हुकुमशहा अ‍ॅडॉल्फ हिटलरच्या राजकीय प्रवासावर भाष्य करणा-या किंवा त्याच्या क्रूरपणाचे दर्शन घडविणा-या आजवर अनेक कादंब-या देशविदेशात प्रसिद्ध झाल्या.  मात्र हिटरला केंद्रस्थानी ठेवून  ‘इतिहासात असे झाले असते तर’ या कल्पनेतून  पहिली मराठी कल्पनाप्रधान कादंबरी साकार झाली आहे. विशेष म्हणजे, ही कादंबरी मूळ मराठीतील. मात्र मराठीमध्ये त्याचे अद्यापही प्रकाशन झालेले नाही.कादंबरीच्या मूळ संहितेवर इंग्रजीेमध्ये '1970 : Return Of Adolf Hitler’ या शीर्षकांतर्गत हे  पुस्तक अनुवादित होऊन तब्बल 23 देशांमध्ये ते प्रकाशित होण्याचा मान चिन्मय मोघे या तरूण लेखकाला मिळाला आहे.  वयाच्या 18 व्या वर्षी इंग्रजीत पुस्तक अनुवादित होणारा तो पहिला मराठी कादंबरीकार ठरला आहे. 
    क्रूरपणा आणि ज्यूंच्या कत्तलीसाठी कुप्रसिद्ध असलेला नेता अशी अ‍ॅडॉल्फ हिटलर याची जगभरात ओळख. परंतु  या नेत्याचा चरित्रात्मक पटच आजवर मांडला गेला आहे. तरूण कादंबरीकार चिन्मय मोघे याने  ‘जरा हटके’ अशा कल्पनाविलासातून हिटलरला वाचकांसमोर आणला  आहे. हिटलरचे प्रेत मित्रराष्ट्रांना सापडलेच नव्हते! मग हिटलर कोठे पळाला असावा? त्याने परत सत्ता बळकवण्याचा प्रयत्न केला तर? हिटलरने इतर देशांमध्ये विविध राजकीय पक्षात त्याचेच गुप्तहेर पाठवले तर?.. आणि १९७०सालापर्यंत हाहा म्हणता हिटलर परत आलाही!! मग काय घडले? या सर्व कल्पनांचा विस्तार म्हणजे ही कादंबरी आहे. 

    या कादंबरीविषयी  ‘लोकमत’ शी बोलताना चिन्मय मोघे म्हणाला, 1945 ला हिटलर गेला असे जर्मनीने घोषित केले. 40 वर्षांनी अभ्यासात उघड झाले की हिटलरचे प्रेत सापडले नाही. जे सापडले ते त्याच्या तीन डुप्लीकेटपैकी एकाचे आहे. मग तो पळून गेला तर कुठे गेला? त्याने काय केले. तो परत आला तर काय घडेल? अशा ऐतिहासिक काल्पनिकतेवर '१९७० : एडॉल्फ हिटलरचे पुनरागमन' ही पहिल्यांदा मराठीमध्ये काल्पनिक कादंबरी लिहिली. या कादंबरीची मूळ संहिता तयार आहे. पण प्रकाशित करण्यास काही अडचणी आल्या. ऐतिहासिक कल्पनाविस्तार हा आपल्याकडे चालणारा विषय नाही. हिटलरच्या चरित्रावर पुस्तक असेल तर आपण करू असे काही प्रकाशकांकडून सांगण्यात आले. हिटलरचे चरित्र चालेल पण कल्पनाविस्तारावर आधारित पुस्तक प्रकाशित करण्यात कुणीही फारसा रस  दाखविला नाही. यातच मराठी पुस्तक प्रकाशित व्हायला वर्ष लागते. मात्र इंग्रजी भाषेत दोन महिन्यात पुस्तक अनुवादित झाले आणि त्याचे प्रकाशन होऊन  विक्रीला देखील सुरूवात झाली. आपल्याकडे प्रकाशनात गतिमानता नाही.  आपल्याकडे पारंपारिक विषयांवर कादंबरी स्वीकारली जाते. मात्र जागतिक विषयांवरचे जे ट्रेंड आहेत. ते सहजासहजी आत्मसात केले जात नाहीत. मराठीत वाचक अजून तयार होतो आहे, अशी प्रकाशकांची मानसिकता आहे. त्यामुळे कुणी प्रकाशकांनी हे पुस्तक प्रकाशित केले नाही तरी मी स्वत: मराठीमध्ये ही कादंबरी प्रकाशित करेन. 
    या इंग्रजी अनुवादित पुस्तकाची पहिली प्रत नेदरलँंडमध्ये विकली गेली आणि मग इंग्लंड, फ्रान्स मध्येही चांगला प्रतिसाद मिळाला. जवळपास २३ देशांमध्ये ही कादंबरी प्रकाशित झाली आहे. या कादंबरीवर चित्रपट निर्मित व्हावा अशी इच्छा असल्याचे त्याने सांगितले. 
------------------------------------------------