माळशेज घाटात दोन अपघातांत चार ठार

माळशेज घाटातील शिसेवाडी आणि आवळेची वाडी वळणावर शुक्रवारी झालेल्या दोन वेगवेगळ्या अपघातांत चौघे ठार, तर सहा जण जखमी झाले. दोन्ही अपघात पिकअप गाड्यांनी दिलेल्या धडकेमुळे झाले आहेत.

शिरोशी : माळशेज घाटातील शिसेवाडी आणि आवळेची वाडी वळणावर शुक्रवारी झालेल्या दोन वेगवेगळ्या अपघातांत चौघे ठार, तर सहा जण जखमी झाले. दोन्ही अपघात पिकअप गाड्यांनी दिलेल्या धडकेमुळे झाले आहेत.
यातील पहिला अपघात शिसेवाडी वळणार झाला. जांभळे घेण्यासाठी निघालेल्या प्रदीप अनंता पठारे, योगेश दगडू भेगडे यांच्या दुचाकीला कल्याणहून नगरकडे जाणाऱ्या पिकअप गाडीने शिसेवाडी वळणावर धडक दिली. त्यात ते दोघे गंभीर जखमी झाले. त्याचवेळी रस्त्याच्या कडेला जांभळे विकणाऱ्या कुशीबाई देऊ वाख (५२), उषा किसन वाख (१०) या दोघींच्या अंगावरूनही पिकअप गाडी गेल्याने त्या जागीच ठार झाल्या. या अपघातात पिकअपमधील पाच जण गंभीर जखमी झाले आहेत. त्यात ओझरच्या सुनंदा कवडे या महिलेचा समावेश असून, अन्य चौघांची नावे समजू शकली नाहीत.
दरम्यान, आवळेची वाडी येथील वळणावर समोरून येणाऱ्या इनोव्हा कारची धडक चुकविण्याच्या नादात पिकअपची दुचाकीला धडक बसून डोंगरवाडी येथील दोन दुचाकीस्वार जागीच ठार झाले, तर एक जण गंभीर जखमी झाला आहे. केशव वाघ (२५) आणि केशव पोकळा (२३) अशी मृतांची, तर कैलास खाकर असे जखमीचे नाव असून, त्याला उल्हासनगरच्या रुग्णालयात दाखल करण्यात आले आहे. (वार्ताहर)