एसटीच्या प्रवाशांना खुशखबर! मासिक/त्रैमासिक पासला मुदतवाढ मिळणार

२२ मार्चपासून कोरोना महामारीच्या पार्श्वभूमीवर राज्यात लॉकडाऊन लागू करण्यात आला होता.  त्यामुळे २२ मार्चपुर्वी एसटीने प्रवास करणाऱ्या अनेक प्रवाशांनी  मासिक /त्रेमासिक पास काढले होते.

मुंबई : लॉकडाऊनमध्ये एसटीची वाहतूक राज्यभर पूर्णपणे थांबवण्यात आली होती. या पार्श्वभूमीवर ज्या प्रवाशांनी आपले मासिक/ त्रैमासिक पास काढले असतील, परंतु त्यांना टाळेबंदीमुळे प्रवास करणे शक्य झाले नसेल. अशा प्रवाशांना त्यांच्या मासिक/ त्रैमासिक पाससाठी मुदतवाढ देण्यात येत असून, ज्यांना या मासिक/ त्रैमासिक पासचा परतावा पाहिजे असेल, त्यांना देखील तो परतावा देण्याची व्यवस्था एसटी महामंडळाने केली आहे, अशी माहिती परिवहन मंत्री तथा एसटी महामंडळाचे अध्यक्ष अनिल परब यांनी दिली आहे. यासंदर्भात  परिपत्रक महामंडळाच्या वाहतूक विभागामार्फत लागू करण्यात आले आहे.

२२ मार्चपासून कोरोना महामारीच्या पार्श्वभूमीवर राज्यात लॉकडाऊन लागू करण्यात आला होता.  त्यामुळे २२ मार्चपुर्वी एसटीने प्रवास करणाऱ्या अनेक प्रवाशांनी  मासिक /त्रेमासिक पास काढले होते. परंतु एसटी बंद असल्याने त्यांना या काळात प्रवास करणे शक्य झाले नाही .अशा प्रवाशांच्या मासिक/ त्रैमासिक पासला सध्या मुदतवाढ देण्यात येत असून, ज्यांना आपला पास रद्द करून, उर्वरित रकमेचा परतावा हवा असेल, त्यांना देखील तो परतावा देण्याची सुविधा एसटी प्रशासनाने दिली आहे. त्यासाठी संबंधित प्रवाशांनी जवळच्या आगारात जाऊन आगार प्रमुखांच्या नावे विहित नमुन्यात अर्ज सादर करणे आवश्यक आहे. त्यानंतर त्यांना, त्यांच्या मासिक/ त्रैमासिक पासला मुदतवाढ अथवा त्यांच्या पासचा उर्वरित परतावा रक्कम देण्याची व्यवस्था आगार पातळीवर करण्यात येईल, अशी माहिती एसटी महामंडळाकडून देण्यात आली आहे.

लाेकल सेवा सामान्य प्रवाशांसाठी सुरळीत सुरु झाल्यावर प्रवाशांना त्यांच्या वाया गेलेल्या दिवसाचा पासचा कालावधी वाढवून मिळणार आहे. तेव्हा प्रवाशांनी जुना पास जपुन ठेवावा, असे आवाहन प्रवासी संघटनेच्यावतीने केले आहे.  सध्या फक्त अत्यावश्यक सेवेतील कामगारांना त्याच्या जुन्या पासाचे शिल्लक दिवस वाढवुन देण्यात येत आहेत.  सरकारी ओळखपत्र दाखवताच नवा पास आणि तिकिट दिले जात आहेत.