ठरलं! आता गुणरत्न सदावर्तेही अयोध्येला जाणार; रामलल्लाचं दर्शन घेणार, साधू-महंतांचे निमंत्रण

कष्टकरी जनसंघ हिंदुस्थानला सुजलाम सुफलाम करण्यासाठी अयोध्येला जाणार असून, प्रभू श्रीरामांचे दर्शन घेणार असल्याचे गुणरत्न सदावर्ते यांनी सांगितले.

मुंबई: मनसे अध्यक्ष राज ठाकरे (Raj Thackeray) यांनी अयोध्या दौऱ्यावर जाणार असल्याचे जाहीर केल्यानंतर आता महाराष्ट्रातील अन्य नेत्यांनीही अयोध्या दौऱ्याचे आयोजन केले आहे. युवासेना नेते आणि राज्याचे पर्यटन, पर्यावरण मंत्री आदित्य ठाकरे (Aaditya Thackeray) अयोध्या दौऱ्यावर जाणार आहेत. तर, राष्ट्रवादीचे आमदार रोहित पवार (Rohit Pawar) यांचाही अयोध्या दौरा झाल्याचे सांगितले जात आहे. यात आता विधिज्ञ गुणरत्न सदावर्ते (Gunaratna Sadavarte) यांनीही अयोध्येला जाणार असल्याचे जाहीर केले आहे.  

गुणरत्न सदावर्ते यांची मुंबई पोलिसांनी पुन्हा एकदा चौकशी केली. त्यानंतर ते माध्यमांशी बोलत होते. आपण राम जन्मभूमीच्या केसमध्ये वकील होतो, त्यामुळे आपल्याला अयोध्येतून बोलावणे आले आहे, अशी माहिती गुणरत्न सदावर्ते यांनी दिली. गुणरत्न सदावर्ते यांच्यासोबत त्यांच्या पत्नी जयश्री पाटील याही अयोध्या दौऱ्यावर जाणार आहेत. 

अयोध्येत  प्रभू श्रीरामांचे दर्शन घेणार

जय श्रीराम आणि जय भीम म्हणणारे आता कुणालाही घाबरत नाहीत. बँकेची निवडणूक लढवण्याची घोषणा केल्यानंतर पायाखालची वाळू घसरली. अयोध्येत आमचे साधू आणि महंत स्वागत करणार आहेत. डंके की चोट पर यापुढे विरोधकांना उत्तर देऊ. आमचे हक्क राज्य सरकार असे पायदळी तुडवू शकत नाही. कष्टकरी जनसंघ हे हिंदुस्थानला सुजलाम सुफलाम करण्यासाठी या महिन्याच्या शेवटी अयोध्येला जाणार असून प्रभू श्रीरामांचे दर्शन घेणार असल्याचे गुणरत्न सदावर्ते यांनी सांगितले. 

दरम्यान, मुंबई पोलिसांनी गुणरत्न सदावर्तेंना पुन्हा एकदा नोटीस बजावली आहे. त्यामुळे गावदेवी पोलिसांनी त्याची चौकशी केली. ही नोटीस राजकीय हेतूने प्रेरित असल्याचा दावा सदावर्तेंच्या वकिलांनी केला. गुणरत्न सदावर्तेंना पाठवलेली नोटीस म्हणजे न्यायालयाचा अवमान असल्याचा दावाही सदावर्ते यांच्या वकिलांनी केला. आता यावर १४ जून पर्यंत उत्तर देणार असल्याचे सदावर्ते यांच्या वकिलांनी स्पष्ट केले आहे. दुसरीकडे, गुणरत्न सदावर्ते यांनी 'एसटी कष्टकरी जनसंघ' या संघटनेची स्थापना केली आहे. या माध्यमातून ते एसटी बँकेची निवडणूक लढवणार आहेत. तसेच यापुढे राज्यातील प्रत्येक निवडणूक आपण लढणार असल्याचे त्यांनी घोषित केले आहे.