५५० रुपयांमध्ये हजाराची नोट

बांगलादेशमार्गे भारतात दाखल झालेल्या एक हजार रुपयांच्या बनावट नोटा अवघ्या ५५० रुपयांमध्ये ठाण्यात वटवल्या जात असल्याची माहिती ठाणे गुन्हे अन्वेषण विभागाच्या तपासात उघड झाली आहे.

जितेंद्र कालेकर,  ठाणे
बांगलादेशमार्गे भारतात दाखल झालेल्या एक हजार रुपयांच्या बनावट नोटा अवघ्या ५५० रुपयांमध्ये ठाण्यात वटवल्या जात असल्याची माहिती ठाणे गुन्हे अन्वेषण विभागाच्या तपासात उघड झाली आहे. या पथकाने एक बांगलादेशी नागरिक व बनावट नोटा चलनात आणणारे एजंट यांचे रॅकेट उघड केले आहे.
पकडलेल्या बांगलादेशीकडे भारतीय आधारकार्ड आणि पॅनकार्ड मिळाले असून, त्याच्याकडून आतापर्यंत एक हजारांच्या ४०८ तर शंभर रुपयांच्या २० अशा चार लाख दहा हजारांच्या बनावट नोटा हस्तगत करण्यात आल्या आहेत. विशेष म्हणजे, अगदी हुबेहूब वाटतील अशा या बनावट नोटा आहेत. या प्रकरणी राज्याच्या दहशतवादविरोधी पथकासह भारतीय गुप्तचर विभागाच्या (आयबी) अधिकाऱ्यांनीही यातील आरोपींची चौकशी केल्याची माहिती सूत्रांनी दिली.
गुन्हे अन्वेषण विभागाच्या अमली पदार्थविरोधी पथकाने अलीकडेच ठाण्याच्या सिडको बसस्टॉपवर एक हजारांच्या बनावट नोटा वटविण्यासाठी आलेल्या अब्दुल्ला सिकंदर उर्फ मोटू शोपान मंडल, मोहंमद सोबुज मोटर खान आणि नजमुल हसन अहमद अली शेख या तिघांना अटक केल्यानंतर या प्रकरणाचा उलगडा झाला. पोलीस निरीक्षक मंदार धर्माधिकारी, उपनिरीक्षक मनोहर घाडगे आणि हवालदार उत्तम भोसले यांच्या पथकाने घेतलेल्या झडतीत त्यांच्याकडून एक हजारांच्या ४० बनावट नोटा मिळाल्या. त्यानंतर, त्यांनी वेगवेगळ्या दुकानांत वटविलेल्या एक हजारांच्या आणखी दोन बनावट नोटाही या पथकाने मिळविल्या. बांगलादेशी असलेल्या अब्दुल्लाकडून भारतीय आधारकार्ड आणि पॅनकार्डही हस्तगत केले आहे. गेल्या दोन वर्षांपासून तो मुंब्रा भागात वास्तव्याला होता. त्याने बांगलादेशातील महाबूल, राजू आणि मनिरुल या तिघांच्या मदतीने एक हजारांच्या नोटा वटविण्यासाठी आणल्याची माहिती दिली. त्यानंतर, पोलिसांनी त्याच्या मुंब्य्रातील घरातून एक हजार रुपये दराच्या ३६४ अर्थात तीन लाख ६४ हजारांच्या आणखी बनावट नोटा हस्तगत केल्या. त्याच्या घराच्या झडतीमध्ये खरेदी केलेले नवीन कपडे, घरगुती वापराच्या वस्तू, मोबाइल आणि बॅगाही मिळाल्या. मोहंमद खान हा मूळचा पश्चिम बंगालचा तर नजमुल हा अहमदाबाद, गुजरातचा रहिवासी असून या दोघांनीही नोटा वटविण्यासाठी अब्दुल्ला याला मदत केली. दिवा, डोंबिवली, कल्याण, उल्हासनगर, अंबरनाथ आणि बदलापूर या परिसरात या टोळीने बनावट नोटा वटवल्या आहेत.
गॅस कनेक्शनही
मिळविले
अब्दुल्ला याने कर्नाटक बँकेच्या डोंबिवली शाखेत खाते उघडले आहे, तसेच त्याने मुंब्रा येथून गॅस कनेक्शनही मिळविले. आता या बँक खात्याची आणि त्याने मिळवलेल्या गॅस कनेक्शनची चौकशी पोलिसांनी सुरू केली आहे.
पाकिस्तानमध्ये निर्मिती झालेल्या या नोटा थेट भारतात आणण्याऐवजी आधी बांगलादेशात नेल्या जातात. बांगलादेशात एक हजार रुपयांच्या एका नोटेकरिता ३५० रुपये एजंटांना दिले जातात. भारतात ४५० रुपयांच्या मोबदल्यात या नोटा घेतल्या जातात, तर भारतात त्या वटविताना ५५० रुपयांना त्यांची विक्री होते. या नोटा वटविण्यासाठी किरकोळ दुकानांमधून ३०० ते ४०० रुपयांचे सामान खरेदी केले जाते, अशी माहिती सूत्रांनी दिली. अलीकडेच एटीएसच्या ठाणे पथकानेही भिवंडीतून काही बांगलादेशींना अटक केली होती. त्यांच्याकडूनही अधिकृत आधार आणि पॅनकार्ड हस्तगत करण्यात आले होते.