आईच्या वागणुकीला कंटाळून त्याने केली हत्या

आईवडिलांच्या भांडणाला कंटाळून मुलानेच जन्मदात्रीची निर्घृण हत्या केल्याची धक्कादायक माहिती वाकोला पोलीस पत्नीच्या हत्या प्रकरणातून उघड झाली

ऑनलाइन लोकमत
मुंबई, दि. 25 - अभ्यासावरून आईकडून होणारा मानसिक छळ, त्यात घरातील आईवडिलांच्या भांडणाला कंटाळून मुलानेच जन्मदात्रीची निर्घृण हत्या केल्याची धक्कादायक माहिती वाकोला पोलीस पत्नीच्या हत्या प्रकरणातून उघड झाली. याप्रकरणी पसार असलेल्या सिद्धांतला जोधपूरमधून ताब्यात घेण्यात आले आहे.

सांताक्रूझ पूर्वेकडील प्रभात कॉलनीतील एजी पार्कमध्ये गेल्या तीन वर्षांपासून ज्ञानेश्वर गणोरे हे पत्नी दीपाली आणि मुलगा सिद्धांतसोबत राहतात. खार पोलीस स्टेशनमध्ये पोलीस निरीक्षक म्हणून कार्यरत असलेल्या गणोरे यांनी शीना बोरा हत्या प्रकरणाच्या तपास पथकात काम केले आहे. मंगळवारी रात्री टायर्ड आॅफ हर, कॅच मी अँड हँग मी, असे रक्ताने लिहिलेल्या मजकुराशेजारी पोलीस निरीक्षक ज्ञानेश्वर गणोरे यांच्या पत्नीच्या आढळलेल्या मृतदेहामुळे सांताक्रूझ परिसरात एकच खळबळ उडाली.

हत्येची घटना उघडकीस आल्यापासून मुलगा सिद्धांत बेपत्ता आहे. यामागे मुलाचा हात असल्याचा संशय वर्तविण्यात येत होता. गुरुवारी दुपारी जोधपूर येथील एका हॉटेलमधून मुलगा सिद्धांतला पोलिसांनी ताब्यात घेतले आहेत. तेथे त्यानेच आईची हत्या केल्याची कबुली दिली आहे. आईला वागणुकीला कंटाळून त्याने हे पाऊल उचलले आहे. त्याचे त्याला दुःख नसल्याचेही त्याने प्रसारमाध्यमांशी बोलताना सांगितले आहे. लवकरच मुंबई पोलिसांनी त्याचा ताबा घेतला असून त्याला मुंबईत आणण्यात येत आहे.