एसटी-ट्रकची भीषण टक्कर

एसटी बसला मागून येणाऱ्या ट्रकने जोरदार धडक दिल्याने झालेल्या भीषण अपघातात ट्रकचालकासह एसटीचे चालक आणि वाहक ठार झाले.

वसई : बोईसरहून स्वारगेटला जाणाऱ्या एसटी बसला मागून येणाऱ्या ट्रकने जोरदार धडक दिल्याने झालेल्या भीषण अपघातात ट्रकचालकासह एसटीचे चालक आणि वाहक ठार झाले. अपघातात ७ प्रवासी गंभीर जखमी झाले असून १० ते १२ जण किरकोळ जखमी झाले आहेत. ही घटना आज दुपारी हायवेवरील लोढा धाम मंदिराजवळ घडली.
वालीव पोलिसांनी घटनास्थळी पोहोचून जखमींना काशिमीरा येथील आॅर्बिट हॉस्पिटलमध्ये उपचारासाठी नेले आहे. अपघाताच्या ठिकाणी बस क्रेनच्या साहाय्याने काढण्यात आली. पोलिसांनी रेस्क्यू आॅपरेशन करून मृतदेह बसमधून बाहेर काढले. दंगल नियंत्रण पथकाला पाचारण करून वाहतूक सुरळीत करण्यात आली.
मुंबई - अहमदाबाद महामार्गावर वालीव पोलीस स्टेशनच्या हद्दीत लोढा धाम मंदिराजवळ आणि सनशाइन हॉटेलच्या समोर दुपारी ३ वाजून १० मिनिटांनी मागून आलेल्या ट्रकने बोईसर डेपोच्या बोईसर-स्वारगेट बसला पाठीमागून जोरदार धडक दिली. ट्रक इतक्या भरधाव वेगात होता की एसटी बसला धडक लागताच एसटी पूर्णपणे गोल गोल फिरली आणि परत ट्रकवर धडकली. एसटी बसमधील प्रवासी अक्षरश: धडाधड बाहेर फेकले गेले. या अपघातात ट्रक ड्रायव्हर रामजी उर्फ पिंटू, बोईसर डेपोचे एसटी चालक ईश्वर आत्राम (३०) आणि वाहक विशाल जाधव (२६) मृत्युमुखी पडले आहेत. अपघातात ७ प्रवासी गंभीर जखमी झाले असून त्यांना खाजगी हॉस्पिटलमध्ये दाखल करण्यात आले आहे. (प्रतिनिधी)