अनैतिक संबंधातून पत्नीने केला पतीचा खून

पुणे, दि. 18 : वारजे पोलीस ठाण्याच्या हद्दीत गेल्या आठवड्यात झालेल्या तरुणाच्या खुनाचे गूढ उकलण्यात पोलिसांना यश आले आहे. अनैतिक संबंधामध्ये अडसर ठरत असल्याने पत्नीनेच प्रियकराच्या मदतीने खून केल्याचे तपासात निष्पन्न झाले आहे.

 

बजरंग सीताराम कदम (वय 38, रा. अक्षय व्हिला, शिवणे) असे खून झालेल्याचे नाव आहे. पोलिसांनी आशिष रोहिदास नलावडे (वय 28, रा. शिवणे), बाळू किसन पाकिरे (वय 34, रा. धायरी), नितीन किसन येडे (वय 24, रा. मोरेवस्ती, पद्मावती) यांच्यासह बजरंगची पत्नी सुवर्णा आणि तिची मैत्रीण सविता दत्तात्रय काळे (वय 32) यांनाही अटक केली आहे. 

 

सुवर्णाचे आणि आशिष यांचे अनैतिक संबंध आहेत. याबाबत बजरंगला संशय आला होता. त्यामुळे तो नेहमी तिला शिविगाळ करायचा. त्याला कंटाळलेल्या सुवर्णाने आशिषला त्याचा काटा काढायला सांगितले. त्याने बाळू आणि नितीनच्या मदतीने बजरंगचा 11 जून रोजी रात्री बाराच्या सुमारास खून केला होता. 

 

बजरंग रिक्षा चालक होता. तसेच तो भिशीचे पैसेही गोळा करायचा. घटनेच्या दिवशी त्याच्यासोबत अडीच लाखांची रोकड होती.मात्र त्याला हल्लेखोरांनी हात लावला नव्हता. तसेच त्याच्या अंगावरील सोनसाखळीही तशीच होती. त्यामुळे चोरीच्या उद्देशाने हा खून झाला नसल्याचे समोर आल्यावर पोलिसांनी त्याच्या पत्नीकडे चौकशी केली. त्याच्या अंत्यविधीच्या वेळी साध्य वेशातील महिला आणि पुरुष पोलीस सहभागी झाले. त्याच्या पत्नीवर संशय बळावल्यावर तिच्यासह मुलीवर लक्ष ठेवण्यात आले. सुवर्णाला ताब्यात घेऊन चौकशी करण्यात आली. तिने खुनाची कबुली दिली. 

 

बजरंग हा पुण्यातील सराईत गुन्हेगार बाबूलाल मोहोळचा मेव्हणा होता. त्याच्यावर कोणताही गुन्हा दाखल नसून तो सरळमार्गी होता असे पोलिसांनी सांगितले.